એકશન મોડ / અમદાવાદ: બે મહિનાના વિલંબ બાદ પ્રોપર્ટી ટેક્સ બિલને લઇને તંત્ર દ્વારા કરાશે આ કાર્યવાહી

સોમવારથી પ્રોપર્ટી ટેક્સ બિલનું વિતરણ ચાલુ કરાશે

આ વખતે કોરોના મહામારીના કારણે મ્યુનિ. તંત્રના અનેક આયોજન પર માઠી અસર પડી છે. મ્યુનિ. પ્રોપર્ટી ટેક્સ વિભાગના કર્મચારી-અધિકારી પણ કોરોનાગ્રસ્ત થયા છે. એપ્રિલ-મે એમ બે મહિનાના લોકડાઉનથી પ્રોપર્ટી ટેક્સ બિલનું વિતરણ પણ વિલંબમાં મુકાયું છે. જોકે આગામી સોમવારથી શહેરના ૧૮ લાખ પ્રોપર્ટી ટેક્સ કરદાતાને પ્રોપર્ટી ટેક્સ બિલ મળતાં થઇ જશે. રોજના એક વોર્ડમાં ર૦૦ બિલનું વિતરણ કરાશે અને એક મહિનામાં વિતરણનું કામ આટોપી લેવાશે.

બોપલ-ઘુમા વિસ્તારમાં 2021022નું વિતરણ કરાશે

જોકે દ‌િક્ષણ ઝોનમાં હજુ ચતુવર્ષીય આકારણીનું કામ ચાલતું હોઇ આ ઝોનમાં દિવાળી પછી પ્રોપર્ટી ટેક્સ બિલનું વિતરણ કરાશે. આ ઉપરાંત બોપલ-ઘુમામાં આગામી નાણાકીય વર્ષ ર૦ર૧-રરથી પ્રોપર્ટી ટેક્સ બિલ અપાશે. ચાલુ વર્ષે આ બંને જૂની નગરપાલિકા વિસ્તારમાં તે સમયના સત્તાવાળાઓ દ્વારા પ્રોપર્ટી ટેક્સ બિલનું વિતરણ કરાયું હોઇ મ્યુનિ. પ્રોપર્ટી ટેક્સ વિભાગ આગામી નાણાકીય વર્ષ ર૦ર૧-રરથી બોપલ-ઘુમામાં મ્યુનિ. કોર્પોરેશનના પ્રોપર્ટી ટેક્સ બિલનું વિતરણ કરશે.

કઠવાડાથી ચિલોડામાં મિલકતનો સર્વે શરૂ

જ્યારે કઠવાડાની ૧૪,૦૦૦ અને ચિલોડાની ૮,૦૦૦ મિલકતનો સર્વે શરૂ કરાયો હોઇ આ બંને વિસ્તારના લગભગ રર,૦૦૦ બિલનું વિતરણ પણ દિવાળી પછી હાથ ધરાશે. જોકે સર્વેની કામગીરી નિર્ધારિત સમયાનુસાર આટોપી લેવાશે તો કઠવાડા-ચિલોડાના નાગરિકોને દિવાળીની આસપાસ પણ પ્રોપર્ટી ટેક્સના બિલ મળી શકે છે.

ચાલુુ નાણાકીય વર્ષમાં આવકના લક્ષ્યાંકમાં કરોડોનો ફટકો

તંત્ર દ્વારા ચાલુ નાણાકીય વર્ષ ર૦ર૦-ર૧માં પ્રોપર્ટી ટેક્સમાં આવકનો લક્ષ્યાંક રૂ.૧ર૦૦ કરોડનો રખાયો છે. જોકે કોરોના મહામારીને પગલે લદાયેલાં બે મહિનાનાં લોકડાઉન અને બજારમાં મંદીનાં કારણે વર્ષાંતે એટલે કે તા.૩૧ માર્ચ, ર૦ર૧ સુધીમાં લક્ષ્યાંક મેળવવો અઘરો બનશે. કોરોના મહામારીથી તંત્ર રૂ.૧,૦૦૦ કરોડ મેળવી શકશે. આમ ચાલુુ નાણાકીય વર્ષમાં આવકના લક્ષ્યાંકમાં રૂ.ર૦૦ કરોડનો ફટકો પડશે.

રાજ્ય સરકારની કોમર્શિયલ મિલકતમાં આત્મનિર્ભર યોજનાની આવકના આંકડા

જોકે રાજ્ય સરકારની કોમર્શિયલ મિલકતમાં આત્મનિર્ભર યોજનાથી અપાયેલાં ર૦ ટકા ડિસ્કાઉન્ટ અને તંત્રની એડ્વાન્સ પ્રોપર્ટી ટેક્સ રિબેટ યોજનાના ૧૦ ટકા ડિસ્કાઉન્ટથી મ્યુનિ. તિજોરીમાં ગત તા.૧ ઓકટોબર, ર૦ર૦ની સ્થિતિએ રૂ.પપર.૭૯ કરોડ આવક પેટે ઠલવાયા છે. તંત્રને એપ્રિલમાં ફકત રૂ.૮૭ લાખ, મેમાં રૂ.ર.રપ કરોડ, જૂનમાં રૂ.ર૩૯.૦૧ કરોડ, જુલાઇમાં રૂ.રર૬.૭૬ કરોડ, ઓગસ્ટમાં રૂ.૭૧.૮૪ કરોડ, સપ્ટેમ્બરમાં રૂ.૧૧.૪૦ કરોડ અને ગત તા.૧ ઓકટોબરે રૂ.૬૬ લાખની આવક થઇ હતી.

ઝોન દીઠ આવકની વિગત તપાસતાં ગત તા.૧ એપ્રિલ ર૦ર૦થી ગત તા.૧ ઓકટોબર ર૦ર૦ના સમયગાળામાં પશ્ચિમ ઝોનમાં સૌથી વધુ રૂ.૧પ૩.પ૧ કરોડ, ઉત્તર-પશ્ચિમ ઝોનમાં રૂ.૧૦ર.૩૮ કરોડ, મધ્ય ઝોનમાં રૂ.૮૯.૬૭ કરોડ, દ‌િક્ષણ-પશ્ચિમ ઝોનમાં રૂ.૭ર.૪૬ કરોડ, પૂર્વ ઝોનમાં રૂ.૪૮.૭૦ કરોડ, દ‌િક્ષણ ઝોનમાં રૂ.૪૩.૪૭ કરોડ અને ઉત્તર ઝોનમાં રૂ.૪ર.૬૦ કરોડની આવક થઇ છે. જોકે ગત નાણાકીય વર્ષ ર૦૧૯-ર૦માં ગત તા.૧ એપ્રિલ, ર૦૧૯થી ગત તા.૧ ઓકટોબર ર૦૧૯ના સમયગાળામાં મ્યુનિ. તિજોરીમાં રૂ.૭૧૮.પ૮ કરોડ ઠલવાયા હતા. તેની સરખામણીમાં ચાલુ વર્ષે આટલા સમયગાળામાં તંત્રને રૂ.પપર.૭૯ કરોડની આવક થવા પામી છે.

હેરિટેજ મિલકતના તંત્ર દ્વારા અલગ ટેક્સ બિલ

કોટ વિસ્તારની આશરે રપ૦૦ જેટલી હેરિટેજ મિલકતના બિલિંગની કાર્યવાહી હેઠળ ૧પથી ર૦ દિવસ લાગશે. તંત્ર દ્વારા હેરિટેજ મિલકત ધારકને અલગથી પ્રોપર્ટી ટેક્સ બિલ અપાઇ રહ્યા છે. અત્રે ઉલ્લેખનીય છે કે શહેરમાં ૪૮ વોર્ડ પૈકી દ‌િક્ષણ ઝોનના મણિનગર, ઇસનપુર, ઇન્દ્રપુરી, ખોખરા, દાણીલીમડા, બહેરામપુરા, વટવા અને લાંભા એમ આઠ વોર્ડ છોડીને બાકીના ૪૦ વોર્ડમાં પ્રોપર્ટી ટેક્સ બિલનું સોમવારથી વિતરણ હાથ ધરાશે.