અમદાવાદ શહેરમાં સવારે ઠંડી, બપોરે ગરમી અને રાતે વરસાદની ટ્રિપલ સિઝન જોવા મળી રહી છે ત્યારે રાજ્યમાં હજુ પાંચ દિવસ વરસાદી માહોલ જોવા મળશે.
અમદાવાદમાં એકસાથે ટ્રિપલ સિઝનનો અનુભવ
ઠંડી, ગરમી અને વરસાદનો એકસાથે અનુભવ
રાજ્યમાં હજુ 5 દિવસ વરસાદની સંભાવના
ફાંટાબાજ કુદરતના કરિશ્માના કારણે અમદાવાદીઓ ભારે પરેશાન થઈ ચૂક્યા છે. અત્યારે શહેરના વાતાવરણમાં સવારે ઠંડીથી શિયાળો, બપોરે ગરમીથી ઉનાળો અને રાત્રે વરસાદથી ચોમાસું - એમ ટ્રિપલ સિઝન ચાલી રહી છે. આ પ્રકારે ફાગણમાં કુદરતે રંગ બદલ્યો હોય તેવું ભાગ્યે જ જોવા મળ્યું છે તેમ વડીલ-વૃદ્ધો જણાવી રહ્યા છે. જોકે આવા મુશ્કેલીભર્યા માહોલથી વૃદ્ધો સહિત બાળકોમાં તાવ, કફ, શરદીનો રોગચાળો ફેલાયો છે.
અમદાવાદમાં સવારથી ઠંડુ વાતાવરણ
અમદાવમાં આજે શહેરનું હવામાન શિયાળાની એક સવાર જેવું હતું.સવારથી ફૂંકાયેલા ઠંડા પવનોના પગલે લોકોએ ઠંડક અનુભવી હતી. આજે શહેરનું લઘુતમ તાપમાન ૧૮.૫ ડિગ્રી સેલ્સિયસ નોંધાયું હતું, જે સામાન્ય તાપમાન કરતાં બે ડિગ્રી ઓછું હતું. જ્યારે ગઈ કાલે ૩૨.૭ ડિગ્રી સેલ્સિયસ મહત્તમ તાપમાન હતું, જે સામાન્ય તાપમાન કરતાં ચાર ડિગ્રી વધુ હતું, જ્યારે આજે સવારે ૮.૩૦ વાગ્યે હવામાનો ભેજ ૭૨ ટકા જેટલો ઊંચો નોંધાયો હતો.
રાજ્યમાં પણ હજુ પાંચ દિવસ વરસાદી માહોલ
શહેરમાં ગુરુવાર તા. ૨૩ માર્ચથી આકાશ સ્વચ્છ થશે તેમ સ્થાનિક હવામાન વિભાગની આગાહી છે, ત્યાં સુધી આકાશમાં વાદળાં છવાયેલાં રહેશે. તે દરમિયાન, રાજ્યમાં પણ હજુ પાંચ દિવસ વરસાદી માહોલ રહેશે. આજે બનાસકાંઠા, સાબરકાંઠા, અરવલ્લી, મહીસાગર, પોરબંદર, જૂનાગઢ અને કચ્છના છુટાછવાયા વિસ્તારોમાં, જ્યારે આવતી કાલે બનાસકાંઠા, પાટણ, મહેસાણા, સાબરકાંઠા, રાજકોટ, જામનગર, અમરેલી, ભાવનગર અને કચ્છ, તા. ૨૨ માર્ચે બનાસકાંઠા, સાબરકાંઠા, રાજકોટ, જામનગર, પોરબંદર, જૂનાગઢ, અમરેલી, ભાવનગર, દ્વારકા, ગીર સોમનાથ અને કચ્છ, તા. ૨૩ માર્ચે બનાસકાંઠા, મહેસાણા, સાબરકાંઠા, રાજકોટ, જામનગર, પોરબંદર, જૂનાગઢ, અમરેલી, ભાવનગર, દ્વારકા, ગીર સોમનાથ અને કચ્છમાં છૂટાછવાયા વિસ્તારોમાં ગાજવીજ સાથે હળવો વરસાદ તૂટી પડવાની આગાહી કરાઈ છે.
સાઇક્લોનિક સરક્યુલેશનની અસર ગુજરાત પર
સ્થાનિક હવામાન વિભાગનાં સૂત્રો કહે છે, પૂર્વ રાજસ્થાન અને તેને સંલગ્ન પશ્ચિમ મધ્ય પ્રદેશ તેમજ પશ્ચિમ રાજસ્થાન અને તેની આસપાસના વિસ્તારોમાં ફેલાયેલા સાઇક્લોનિક સરક્યુલેશનના પગલે રાજ્યમાં હજુ વરસાદી માહોલ રહેવાનો છે. આના કારણે જગતના તાતની હાલત વધુ કફોડી બનવાની છે.