અમદાવાદ: રાજ્યમાં ફરી એકવાર ઠંડીનો ચમકારો જોવા મળી શકે છે. રાજ્યમાં ફરી એકવાર વાતાવરણમાં પલટો આવે તેવી શક્યતા છે. ઉત્તર-પૂર્વીય પ્રદેશમાં હિમવર્ષાના કારણે ઠંડીનું પ્રમાણ વધી શકે છે. આગામી 21 ફેબ્રુઆરીથી 26 ફેબ્રુઆરી સુધી ઠંડીનું જોર વધી શકે છે. તો આવતીકાલથી પણ પવનની ગતિ તેજ થાય તેવી શક્યતા છે.
આપને જણાવી દઇએ કે છેલ્લા 2 દિવસથી ઠંડીનો ચમકારો ઘટ્યો છે અને વાતાવરણમાં ગરમી પ્રસરેલી જોવા મળી રહી છે ત્યારે આજરોજ રાજ્યના હવામાન વિભાગે ફરી એકવાર વાતાવરણમાં પલટો આવે તેવી આગાહી કરી છે. જેના કારણે ગુજરાતમાં ફરીથી ઠંડીનું જોર વધી શકે છે.
માવઠાંની આશંકા
હવામાન વિભાગની આગાહી પ્રમાણમાં આગામી 2 દિવસોમાં કોલ્ડવેવની અસર સર્જાઈ શકે છે. આ ઉપરાંત રાજ્યમાં ઠંડીનું પ્રમાણ યથાવત્ રહેશે તેવી પણ આગાહી કરવામાં આવી છે. હવામાન વિભાગની આગાહી ખેડૂતો માટે પણ માઠાં સમાચાર લઈને આવ્યું છે.
આગામી દિવસોમાં ગુજરાતમાં છુટો છવાયો કમોસમી વરસાદ પણ પડી શકે છે. હવામાન વિભાગ અનુસાર ગુજરાતમાં સૌરાષ્ટ્ર અને કચ્છમાં વરસાદ પડી શકે છે. રાજસ્થાનમાં સર્જાયેલા વેસ્ટર્ન ઇન્ડસ ડિસ્ટર્બન્સને કારણે ગુજરાતમાં વરસાદ પડવાની સંભાવના છે. આવામાં જો કમોસમી વરસાદ થાય છે તે ખેડૂતો માટે ચિંતા વધી જશે.