સારા સમાચાર / જો અમદાવાદની આ કંપનીની દવા કામ કરી ગઈ તો કોરોનાની વૅક્સિન 2 મહિનામાં બની ગઈ સમજો, SARSમાં થઈ હતી સફળ

• કોરોનાના ડર વચ્ચે ગુજરાતથી વધારે એક સારા સમાચાર
• કેડિલા ફાર્મા કંપની કોરોનાની રસી બનાવશે 
• કેડિલા ફાર્માએ અગાઉ સાર્સની દવા વિકસાવી છે 

કોરોના નામના રાક્ષસે વિશ્વભરમાં હાહાકાર મચાવ્યો છે. લોકો દિન પ્રતિદિન મરી રહ્યા છે. લાખો લોકો તેના સંક્રમણમાં આવી ગયા છે. વેક્સિન જ એકમાત્ર તેનો ઈલાજ છે. તેના જ કારણે વિશ્વભરના રિસર્ચર્સ હાલ વેક્સિન શોધવામાં લાગેલા છે. સામાન્ય રીતે કોઈ પણ વેક્સિન શોધવામાં અનેક વર્ષો લાગે છે. પણ જે રીતે કોરોનાની વેક્સિન શોધવામાં વૈજ્ઞાનિકો હાલ જે ઝડપથી કામ કરી રહ્યા છે તેને જોતા કહી શકાય કે બહુ જલદી આમા સફળતા મળશે. ત્યારે કેડિલા ફાર્મા કંપની કોરોનાની વેક્સિન બનાવશે. મહત્વનું છે કે, કેડિલા ફાર્માએ અગાઉ સાર્સની દવા વિકસાવી છે. કેડિલા ફાર્માની સાર્સની દવા કોરોનામાં ઉપયોગી થઇ શકે છે. સાર્સની દવા ઉપયોગી થશે તો વેક્સિન બે મહિનામાં તૈયાર થશે. 

વિશ્વમાં હાલ કોરોનાનો કહેર છે ત્યારે થોડા દિવસ અગાઉ અમદાવાદની કંપની કેડિલાને દવાઓ બનાવવાનો ઓર્ડર આપવામાં આવ્યો હતો. કેન્દ્ર સરકાર અને આરોગ્ય વિભાગ દ્વારા કંપનીને 15 કરોડ ટેબલેટ તૈયાર કરવાનો આદેશ આપ્યો હતો. આ મામલે કેડિલાના માલિક પંકજ પટેલે ભારત સરકારનો આભાર માન્યો હતો અને તેઓ આ ટાર્ગેટને પૂર્ણ કરીને અન્ય દેશોની પણ મદદ કરશે તેવો આશાવાદ વ્યક્ત કર્યો હતો.

કેડિલા ગ્રુપના ચેરમેન પંકજ પટેલે દાવો કર્યો હતો

કોરોના વાયરસની દવા ભારત પુરી પાડે તેવી પુરી શક્યતા છે. થોડા સમય અગાઉ ઝાયડ્સ કેડિલા ગૃપના ચેરમેન પંકજ પટેલે દાવો કર્યો હતો કે કોરોનાની દવા આગામી ત્રણ મહિનામાં દર્દીઓ માટે ઉપલબ્ધ થશે.