અગસ્ટા મામલે EDને મળ્યાં મોટા પુરાવા, રાજીવ સકસેનાએ પેન ડ્રાઇવ-ડાયરી સોંપી...

અગસ્ટા વેસ્ટલેન્ડ કૌભાંડ મામલે વધુ એક મોટો પુરાવો ઇડીના હાથે લાગ્યો છે. સરકારી સાક્ષી બનેલા રાજીવ સક્સેનાએ ઇડીને એક પેન ડ્રાઇવ સાથે એક ડાયરી સોંપી છે. વીવીઆઇપી ચૉપર ડીલમાં કથિત રૂપે આપવામાં આવેલી 423 કરોડ રૂપિયાના કૌભાંડની સમગ્ર જાણકારી આ પેન ડ્રાઇવમાં છે.



પેન ડ્રાઇવ અને ડાયરીમાં પૈસાની અગસ્ટા વેસ્ટલેન્ડ ઇન્ટરનેશનલ લિમિટેડ પાસેથી ટ્યૂનીશિયા, મોરિશીયસ, દુબઇ સ્થિત શેલ કંપનીઓ અને સ્વિસ બેંકો સિવાય ભારતમાં વચેટીયા સુધી પહોંચવાની સમગ્ર કહાની છે. સક્સેનાની પર્સનલ ડાયરીમાં જે લોકોનું નામ છે તેમનો ખુલાસો કરવાનો સૂત્રોએ ઇનકાર કરી દીધો છે.



તેઓએ કહ્યું છે કે, સક્સેનાએ માત્ર મધ્યસ્થીની ભૂમિકા નિભાવી હતી જો કે ડાયરી અને પેન ડ્રાઇવના તમામ દસ્તાવેજોથી મોટા ખુલાસા થઇ શકે છે. ઇડીએ દાવો કર્યો છે કે, રાજીવ સક્સેના મોરિશિયસ સ્થિત ઇન્ટરસ્ટેલ ટેક્નોલોજી લિમિટેડ અને દુબઇ સ્થિત બે કંપનીનો માલિક છે અને આ કંપનીમાં લાંચની રકમ ટ્રાન્સફર કરવામાં આવી છે.



ઉલ્લેખનીય છે કે, 31 જાન્યુઆરીએ દુબઇથી સક્સેનાના પ્રત્યાર્પણના તુરંત બાદ ઇડીએ કસ્ટડીમાં લીધો હતો. ત્યાર બાદમાં રાજીવ સક્સેના સરકારી સાક્ષી બનવા તૈયાર થતા ઇડીએ તેની જામીન અરજીનો વિરોધ ન હતો કર્યો.