અમદાવાદ / ખાનગી સામે ટક્કર માટે મ્યુનિ. સ્કૂલો હાઇટેક બનશે, વિદ્યાર્થીઓને મળશે અનેક લાભ

આ બાબતની ગવાહીરૂપ અનેક તસવીરો કે અહેવાલ વારંવાર પ્રસિદ્ધ થતાં રહ્યાં છે, જોકે મ્યુનિસિપલ સ્કૂલની ઇમેજ સુધારવા માટે તંત્રએ સ્માર્ટ સ્કૂલ, અંગ્રેજી માધ્યમની સ્કૂલ, મોડલ સ્કૂલ જેવા અભિગમને અપનાવ્યા બાદ હવે ૧૦ હાઇટેક સ્કૂલઓ બનાવવાનો પ્રોજેકટ હાથ ધર્યો છે.  આ સ્કૂલઓ મોંઘી ફી વસૂલતી ખાનગી સ્કૂલઓ સાથે સ્પર્ધા કરી શકે તેવી હશે તેવો સત્તાવાળાઓનો દાવો છે. 

શહેરમાં મ્યુનિસિપલ સ્કૂલબોર્ડ સંચાલિત કુલ ૩૯૦ સ્કૂલ છે. સ્કૂલબોર્ડની માલિકીનાં ર૧૬ બિલ્ડિંગમાં ચાલતી આ સ્કૂલમાં આશરે ૧.રપ લાખ વિદ્યાર્થી અભ્યાસ કરે છે. આ વિદ્યાર્થીઓ માટે ચાર હજાર શિક્ષક અને કુલ ચાર હજાર વર્ગખંડની સુવિધા છે.
 

મ્યુનિસિપલ કોર્પોરેશન દ્વારા સ્કૂલ ચલાવવા દર વર્ષે કરોડો રૂપિયાનું બજેટ વપરાય છે. તેમ છતાં શિક્ષણની ગુણવત્તાનું સ્તર જળવાતું નથી. બજેટની ૯પ ટકા રકમ શિક્ષકોનાં પગાર-ભથ્થાં પાછળ ખર્ચાતી હોય વિદ્યાર્થીના વિકાસ માટે નાણાં ફાજલ રહેતાં નથી અને સરવાળે બજેટમાં મૂકેલા મોટા ભાગના ઠરાવ હવાઇ જતા હોય છે. 

આવા સંજોગોમાં મ્યુનિસિપલ સ્કૂલબોર્ડના સત્તાધીશોએ અમદાવાદીઓમાં મ્યુનિસિપલ સ્કૂલની ઇમેજને સુધારવા માટે કમર કસી છે અને સમગ્ર શહેરમાં પ્રાઇવેટ સ્કૂલને ટક્કર મારે તેવી હાઇટેક સ્કૂલ બનાવવાની દિશામાં ચક્રો ગતિમાન કર્યાં છે.

મ્યુનિસિપલ સ્કૂલબોર્ડના શાસનાધિકારી લખધીર ડી. દેસાઇ આ અંગે માહિતી આપતાં કહે છે, પ્રારંભિક તબક્કે નિકોલ, વસ્ત્રાલ, બાપુનગર, નારણપુરા અને વાસણા એમ કુલ પાંચ વિસ્તારમાં પાંચથી દસ હજાર વારના પ્લોટને હાઇટેક સ્કૂલ માટે પસંદ કરાયા છે. બીજા પાંચ પ્લોટની શોધ ચાલુ છે. આ તમામ વિસ્તારમાં મોટા ભાગે ગરીબ અને મધ્યમવર્ગના પરિવાર રહે છે.



હાઇટેક સ્કૂલ અદ્યતન સાયન્સ લેબ, ઇ-લાઇબ્રેરી, કમ્પ્યૂટર લેબ, લેંગ્વેજ કોર્નર, મેથ્સ કોર્નર, કલ્ચરલ એક્ટિવિટીઝ માટે ડ્રામા કે થિયેટર રૂમ, વોટર હાર્વેસ્ટિંગ સિસ્ટમ, સૌર ઊર્જા, ફાયર સેફ્ટી, સીસીટીવી કેમેરા, ચોમાસામાં વર્ગખંડમાં પ્રાર્થના કરી શકાય તે માટે‌ સ્પીકર સિસ્ટમ વગેરેથી સજ્જ રહેશે.

તેમણે જણાવ્યું હતું કે ટેનિસકોર્ટ, કબડ્ડી, ખોખો, બાસ્કેટબોલનાં મેદાન, વિદ્યાર્થીઓ માટે સ્વિમિંગ પૂલ તેમજ ટેબલ ટેનિસ, કેરમ અને ચેસ જેવી ઇન્ડોર ગેમ માટેના અલાયદા રૂમની સુવિધા પણ ઊભી કરાશે.

તમામ હાઇટેક સ્કૂલને ઇકો ફ્રેન્ડલી ક્લબમાં રૂપાંત‌િરત કરાશે એટલે કે ત્રણ-ત્રણ ફૂટના સરગવા, લીમડા, તુલસી, કુંવારપાઠા, આંબા વગેરે વૃક્ષોથી હરિયાળી બનાવાશે તેમજ સ્કૂલની દીવાલને વિવિધ વિષયથી રંગીને પતંગિયાં જેવી રંગબેરંગી આકર્ષક બનાવાશે.

આગામી શૈક્ષણિક સત્રથી હાઇટેક સ્કૂલ શરૂ કરવાની દિશામાં અમારા પ્રયાસ રહેશે, જોકે ડિસેમ્બરમાં સર્વે હાથ ધરી જે તે વિસ્તારની હાઇટેક સ્કૂલનું માધ્યમ પસંદ કરાશે.