જો તમે ટ્રાવેલિંગ કરી રહ્યા હોવ તો ખાસ ધ્યાન રાખો કે ખાનગી વાહનોમાં લિફ્ટ લેતા પહેલા સો વખત વિચારજો. કારણ કે ડીસામાં આંખ ઉઘાડી દેતો કિસ્સો સામે આવ્યો છે. ધાનેરા જવા માટે ખાનગી કારની લિફ્ટ માંગતા શિક્ષક લૂંટાયા. અંદાજિત 1,63,500ની લૂંટ કરીને શખ્સો ફરાર થઇ ગયા. આ મામલે પોલીસે તપાસના ચક્રોગતિમાન કરતા આરોપીઓની ધરપકડ કરવામાં આવી છે.
શિક્ષકને લૂંટનાર આરોપીઓ પોલીસ સકંજામાં
ડીસામાં કારમાં લિફ્ટ આપવાના બહાને શિક્ષકનું અપહરણ કરીને લૂંટ ચલાવવા મામલે આરોપીઓને ઝડપી પાડવામાં પોલીસને સફળતા મળી છે. પોલીસે રાજસ્થાનથી ચારેય આરોપીઓની ધરપકડ કરી છે. પોલીસે લૂંટમાં વપરાયેલી બે ગાડી અને 4 બાઇક સહિતનો મુદ્દમાલ જપ્ત કર્યો છે. હાલ પોલીસે ચારેય આરોપીઓને ઝડપી પાડીને વધુ પૂછપરછ હાથ ધરી છે.
કારમાં લિફ્ટ આપવાના બહાને 1,63,500ની કરી હતી લૂંટ
ઉલ્લેખનીય છે કે 30 જૂનના રોજ ડીસાના ગાયત્રી મંદિર આગળ એક શિક્ષકે ધાનેરા જવા માટે કારમાં લિફ્ટ લીધી હતી. શિક્ષક જ્યારે ભાડુ આપવા ગયા ત્યારે ગાડીમાં બેઠેલા અન્ય 4 શખ્સોએ શિક્ષકના મોં પર પાટો બાંધીને હાથ પણ બાંધી દીધા. શિક્ષકને માર મારવા લાગ્યા તેમજ તેમની પાસેથી થેલો પણ છીનવી લીધો. આ સાથે રોકડા, ચેકબુક, મોબાઇલ, પર્સ સહિત એટીએમ અને ગળામાં પહેરેલુ સોનાનું પેન્ડન્ટ પણ ચોરી લઇને જાનથી મારી નાંખવાની ધમકી આપી હતી. ત્યારબાદ 7 કલાક સુધી ગાડીમાં જ ફેરવીને ડીસા હાઇવે પર ચંડીસર પુલ નજીક છોડીને ફરાર થઇ ગયા હતા. આ મામલે શિક્ષકે ડીસામાં અજાણ્યા ચાર શખ્સો વિરુદ્ધ પોલીસ ફરિયાદ નોંધાવતા પોલીસે તપાસના ચક્રોગતિમાન કર્યાહતા. આખરે રાજસ્થાનથી આરોપીઓની ધરપકડ કરવામાં આવી.