18 વર્ષનો શિવા હૈદરાબાદમાં ગ્રેજ્યુએશનનો અભ્યાસ કરી રહ્યો હતો. કોરોના પોઝિટીવ આવતા હોમ આઈસોલેશનનો પ્રશ્ન ઉભો થયો
તેલંગાણાના યુવકની અનોખી રીત
આઈસોલેશન માટે શોધી કાઢ્યો અનોખો ઉપાય
11 દિવસ ઝાડ પર કર્યા પસાર
દેશ હાલ કોરોના મહામારીની બીજી લહેર સામે ઝઝૂમી રહ્યું છે હોસ્પિટલમાં બેડ, દવા, ઓક્સિજન અને વેન્ટિલેટરની અછત છે. એવામાં સામાન્ય લક્ષણો ઘરાવતા કોરોના દર્દીને ક્વોરન્ટાઈન અથવા હોમ આઈસોલેશન માટે સૂચન આપવામાં આવે છે. પરંતુ ઘણા પરિવાર એક રૂમમાં રહે છે. જેમાં કિચનનો અને ઘણાં ઘરોમાં તો શૌચાલયનો પણ સમાવેશ થઈ જાય છે. અવામાં મોટાભાગે કોવિડ દર્દીઓને આઈસોલેટ કરવા માટે જગ્યા નથી મળતી. આ બધા વચ્ચે તેલંગાણાના નાલગોંડા જિલ્લામાં એક કોવિડ દર્દીએ આઈસોલેટ થવાની નવી રીત શોધી કાઢી છે. 18 વર્ષીય વિદ્યાર્થીએ કોરોના સંક્રમિત થયા બાદ 11 દિવસ ઝાડ પર આઈસોલેશનમાં પસાર કર્યા.
લોકડાઉનમાં ઘરે પરત ફર્યો હતો શિવા
એક રિપોર્ટ અનુસાર આ ઘટના નાલગોંડા જિલ્લાના અંતરીયાળ વિસ્તાર કોઠાનંદીકોંડાની છે. 18 વર્ષનો શિવા હૈદરાબાદમાં ગ્રેજ્યુએશનનો અભ્યાસ કરી રહ્યો હતો. કોરોના લોકડાઉનમાં ઘરે પરત ફર્યો હતો. કોરોનાના હલ્કા લક્ષણ જણાતા તેણે પોતાનો ટેસ્ટ કરાવ્યો. 4 મેએ તેનો રિપોર્ટ પોઝિટીવ આવ્યો. રિપોર્ટ અનુસાર શિવાએ જણાવ્યું કે ગામમાં વોલંટિયર્સે તેને કહ્યું કે તે ઘરે રહે અને પોતાના પરિવારથી અલગ રહે. જોકે ઘરની હાલત અને ગામમાં કોઈ આઈસોલેશન સેન્ટર ન હોવાના કારણે તેણે ઝાડની ઉપર આઈસોલેટ થવાનો નિર્ણય કર્યો. ઝાડ પર તેણે 11 દિવસ વિતાવ્યા.
ઝાડ પર આઈસોલેટ થવાનો નિર્ણય કર્યો
શિવે જણાવ્યું ત્યાં કોઈ આઈસોલેશન સેન્ટર ન હતું. મારા પરિવારમાં ચાર સભ્યો છે. મારા લીધે હું કોઈને સંક્રમિત ન હતો કરવા માંગતો. એવામાં ઝાડ પર આઈસોલેટ કરવાનો નિર્ણય કર્યો. તેણે આગળ જણાવ્યું કે, મને નથી ખબર કે ગામમાં વોલન્ટિયર્સે સરપંચને મારા પોઝિટીવ હોવા વિશે જણાવ્યું કે નહીં. પરંતુ ગામમાં કોઈ મારી મદદ માટે આગળ ન હતું આવ્યું. તે બધા આ વાયરસથી ડરેલા હતા. તે પોતાના ઘરમાંથી બહાર ન હતા નિકળી રહ્યા.
બનાવી અનોખી પુલી સિસ્ટમ
શિવાએ ઝાડ પર એક ગોદડુ નાખી દીધુ હતું. ઝાડ તેના ઘરના આંગણાંમાં જ હતું. શિવાએ એક દોરી અને ડોલના સહારે એક પુલી સિસ્ટમ બનાવી લીધુ હતું. તેનું રોજનું ભોજન અને બાકી જરૂરી દવાઓ તે જ પુલી સિસ્ટમ દ્વારા મોકલવામાં આવતું હતું. આ આઈસોલેશન વોર્ડમાં પોતાનો મોટા ભાગનો સમય તે ફોન પર પસાર કરતો હતો. જેને તે એક નાની ટોપલીમાં બાંધીને રાખતો હતો.
ગામથી 30 કિમી દૂર છે હોસ્પિટલ
હકીકતે કોઠાનંદીકોંડામાં લગભગ 350 પરિવાર રહે છે. આ વિસ્તાર નાના આદિવાસી ગામોમાંથી એક છે. અહીંના રહેવાસીનું કહેવું છે કે સૌથી નજીકનું પ્રાથમિક સ્વાસ્થ્ય કેન્દ્ર 5 કિલોમીટર દૂર છે. ઈમરજન્સીની સ્થિતિમાં ગામના લોકોને હોસ્પિટલ માટે 30 કિમી દૂર જવું પડે છે.