મહેસાણાના ઊંઝાના ઉપેરા ગામે યુવતીના પિતા પર થયો હુમલો.. ધ્રુમિલ પટેલ નામના શખ્સ સામે હત્યાના પ્રયાસની ફરિયાદ
મહેસાણાના ઊંઝાના ઉપેરા ગામે હુમલો
યુવતીના પિતા પર યુવકે કર્યો હુમલો
યુવતી સાથે લગ્ન કરવા દબાણ કરી કર્યો હુમલો
રાજ્યમાં ગુનાખોરીનું પ્રમાણ વધી રહ્યુ છે. સરાજાહેરમાં હત્યાના બનાવોમાં વધારો થઇ રહ્યો છે. અસામાજિક તત્વોને જાણે કે પોલીસનો કોઇ ડર રહ્યો જ નથી. જાણે કે કાયદો અને વ્યવસ્થા તો હાથમાં લઇને ફરતા હોય. સુરતની ચકચારી ગ્રીષ્મા હત્યા કેસ. એક તરફી પ્રેમમાં પાગલ સનકી પ્રેમીએ યુવતીની જાહેરમાં હત્યા કરી દીધી હતી. ત્યારે હવે મહેસાણાના ઊંઝામાં પણ એક આવો જ બનાવ સામે આવ્યો છે. પ્રેમ કરનાર યુવકે યુવતીના પિતા પર હુમલો કરી દીધો.
લગ્ન કરવા માટે કરતો હતો હેરાન
આજના આ ઘોર કળિયુગમાં પ્રેમની પરિભાષા કરવી મુશ્કેલ બની છે. પ્રેમ જીવન અને સંબંધોમાં સુવાસ ભેળવે છે. પરંતુ હાલ તો જમાનો એવો આવી ગયો છે પ્રેમ પ્રકરણમાં ખેલાઇ જાય છે ખૂની ખેલ. ત્યારે મહેસાણાના ઊંઝામાં ઉપેરા ગામે યુવતીના પિતા પર યુવકે હુમલો કર્યો હોવાનું સામે આવ્યું છે. યુવતી સાથે લગ્ન કરવા દબાણ કરીને પિતા પર હુમલો કરી દીધો.
આરોપી ધ્રુમિલ પટેલે કર્યો હુમલો
યુવતીના પિતા પર હુમલો કરનાર યુવકનું નામ ધ્રુમિલ પટેલ હોવાનું સામે આવ્યું છે. તે યુવતીને લગ્ન કરવા માટે વારંવાર દબાણ કરતો હતો તેમજ હેરાન પરેશાન પણ કરતો હતો. જેથી યુવતીએ આ અંગે તેના પરિવારમાં જાણ કરી. દિકરીની મદદે આવેલા પિતા ધ્રુમિલને સમજાવવા ગયા પરંતુ ધ્રુમિલ માન્યો નહી. ઉલ્ટાનું તે યુવતીના પિતા પર હુમલો કરી બેઠો ધ્રુમિલ પટેલ નામના શખ્સ સામે હત્યાના પ્રયાસની ફરિયાદ નોંધાઇ છે. ઘટનાને પગલે ઊંઝા પોલીસે ફરિયાદ નોંધીને તપાસ હાથ ધરી છે.