ચિંતાજનક / ગુજરાતના આ ગામમાં 24 જ કલાકમાં 15 શંકાસ્પદ મૃત્યુ થતાં ખળભળાટ, 100થી વધુ છે કોરોના કેસ

• એક દિવસમાં 15 લોકોના શંકાસ્પદ મૃત્યુ
• 15 લોકોના મૃત્યુથી લોકોમાં ભયનો માહોલ
• ગામમાં 100થી વધુ લોકો કોરોના સંક્રમિત
• લોકો દ્વારા સ્વૈચ્છિક ઉકાળા અને હોમિયોપેથીક દવાઓના કેમ્પ યોજાયા

15 લોકોના શંકાસ્પદ મૃત્યુ થતા ચકચાર

ગુજરાતમાં કોરોના વાયરસના કેસ સતત વધી રહ્યા છે. મે મહિનાની શરૂઆતથી કેસની ગતિ ધીમી પડી છે પરંતુ ગુજરાતના ગામડાઓમાં પરિસ્થિતિ હજુ પણ ચિંતાજનક છે. રાજ્યના કેટલાય આખે આખા ગામ કોરોના વાયરસના કારણે પરેશાન છે ત્યારે વડોદરાના એક ગામમાં 24 જ કલાકમાં 15 લોકોના ટપોટપ મોત થયા બાદ આખા વડોદરામાં ખળભળાટ મચી ગયો છે. 

હાલ ગામમાં 100થી વધુ લોકો કોરોના સંક્રમિત

વડોદરાના પાદરાના ચોંકારી ગામે એક દિવસમાં 15 લોકોના શંકાસ્પદ મૃત્યુ થયા હોવાના સમાચાર સામે આવી રહ્યા છે. 24 જ કલાકમાં ટપોટપ લોકોના મોતથી આખા ગામમાં ભયનો માહોલ છે. નોંધનીય છે કે આ ગામમાં 100થી વધારે લોકો કોરોના વાયરસથી સંક્રમિત છે. એવામાં ગામના લોકોની રોગપ્રતિકારક ક્ષમતા વધારવા માટે ઉકાળા તથા હોમિયોપેથીક દવાઓના કેમ્પ યોજવામાં આવ્યા છે. ગામમાં 24 જ કલાકમાં આટલી બધી મોતના કારણે લોકોની માંગણી છે કે તંત્રએ હવે આ ગામમાં વધારે ધ્યાન આપવું જોઈએ. 

ભારતમાં કોરોનાની બીજી લહેરનો કહેર 

ભારત અત્યારે કોરોના વાયરસની બીજી ભયંકર લહેરનો સામનો કરી રહ્યો છે. આ લહેરમાં છેલ્લા ઘણા દિવસથી દરરોજ ત્રણથી ચાર લાખ કોરોના વાયરસના કેસ સામે આવી રહ્યા છે. આ સિવાય હોસ્પિટલોમાં બેડનો અભાવ અને ઑક્સીજન મળી નથી રહ્યો તથા પ્રજા પારવાર મુશ્કેલીનો સામનો કરી રહી છે ત્યારે આ સંકટ વહેલા જાય તેવી પ્રાર્થના દેશભરના નાગરિકો કરી રહ્યા છે.

ગુજરાતમાં સાજા થનારા દર્દીઓ વધ્યા 

કોરોનાની બીજી લહેરમાં રાજ્યમાં સતત ત્રીજા દિવસે નવા કેસ કરતાં સાજા થનાર દર્દીઓની સંખ્યા વધી છે. રાજ્યમાં 12 હજાર 64 નવા કેસ નોંધાયા છે જ્યારે સ્વસ્થ થયેલા દર્દીની સંખ્યા 13 હજાર 85 રહી છે. આમ, સ્વસ્થ થનારા દર્દીઓની સંખ્યા નવા કેસ કરતા વધારે છે.તો કોરોનાથી 119 દર્દીઓના મૃત્યુ થયા છે.

ગુજરાતમાં કોરોનાની પરિસ્થિતિનો ચિતાર 

રાજ્યમાં રિક્વરી રેટ 76.52 ટકાએ પહોંચ્યો છે તથા રાજ્યમાં અત્યાર સુધીમાં 6 લાખ 58 હજાર 36ના રિપોર્ટ પોઝિટિવ આવ્યા છે, જ્યારે મૃત્યુઆંક 8 હજાર 154 થયો છે. તેમજ અત્યાર સુધીમાં 5 લાખ 3 હજાર 497 દર્દી ડિસ્ચાર્જ થયા છે. એક્ટિવ કેસની વાત કરીએ તો રાજ્યમાં હાલ 1 લાખ 46 હજાર 385 એક્ટિવ કેસ છે, જેમાંથી 775 દર્દી વેન્ટિલેટર પર છે, જ્યારે 1 લાખ 45 હજાર 610 દર્દીની હાલત સ્થિર છે.