મહામારી / દિલ્હીમાં કોરોનાનો મોટો બ્લાસ્ટ, એક દિવસમાં 1009 લોકો સંક્રમિત, 60 ટકાનો ઉછાળો

• રાજધાની દિલ્હીમાં કોરોના વકર્યો
• છેલ્લા ચોવીસ કલાકમાં 1000થી વધુ કેસ
• 1 દિવસની તુલનામાં કેસમાં થયો 60 ટકાનો વધારો

દિલ્હીમાં કોરોનાની વિસ્ફોટક ગતિ ચાલુ છે. છેલ્લા 24 કલાકમાં રાજધાનીમાં કોરોનાના 1009 કેસ સામે આવ્યા છે. એક વ્યક્તિનું મોત પણ થયું છે. ગઈકાલે દિલ્હીમાં કોરોનાના 601 કેસ નોંધાયા હતા.

Delhi records 1,009 fresh Covid cases, 60 pc more than Tuesday, and 1 death; positivity rate 5.70 pc: Health Bulletin

— Press Trust of India (@PTI_News) April 20, 2022

દિલ્હીમાં સંક્રમણ દર 5.70 ટકા પર પહોંચ્યો 

છેલ્લા ઘણા દિવસોથી દિલ્હીમાં કોરોનાના કેસ સતત વધી રહ્યા છે. જો તમે છેલ્લા 24 કલાકના આંકડા પર નજર નાખો તો દિલ્હીમાં સંક્રમણ દર 5.70 ટકા પર પહોંચી ગયો છે. 314 લોકો સાજા થઈને પરત ફર્યા છે. હવે ચિંતાની વાત એ છે કે 10 ફેબ્રુઆરી બાદ રાજધાનીમાં કેસ ફરી એકવાર હજારનો આંકડો પાર કરી ગયા છે.

આ પહેલા 10 ફેબ્રુઆરીએ આવ્યાં હતા 1104 કેસ
આ પહેલા દિલ્હીમાં 10 ફેબ્રુઆરીએ 1104 કેસ નોંધાયા હતા જે પછી બીજી વાર 1009 કેસ આવ્યાં છે. 

કેસ વધતા દિલ્હી સરકારે માસ્ક ફરજિયાત બનાવ્યું  

દિલ્હીમાં આ વધતા જતા કેસો વચ્ચે હવે સરકાર સતર્ક થઈ ગઈ છે. હોસ્પિટલોમાં બેડ વધારવા પર ભાર મૂકવામાં આવી રહ્યો છે, તો બીજી તરફ સરકારી હોસ્પિટલોમાં બુસ્ટર ડોઝ ફ્રી ગણવાની વિચારણા ચાલી રહી છે. બુધવારે ડીડીએમએની એક મહત્વપૂર્ણ બેઠક પણ મળી હતી. આ બેઠકમાં જાહેર વિસ્તારોમાં માસ્ક ફરજીયાત કરવામાં આવશે તેવો નિર્ણય લેવાયો હતો. સાથે જ કહેવામાં આવ્યું હતું કે, સ્કૂલો ઓફલાઈન ક્લાસિસ ચાલુ રાખવાની છે પરંતુ પ્રશાસને કોવિડ નિયમોનું કડક પાલન કરવું પડશે. માસ્ક પહેરવાથી લઈને સોશિયલ ડિસ્ટન્સિંગનું પાલન કરવા સુધી, દરેક નિયમનું પાલન કરવું જરૂરી રહેશે. 

ભારતમાં વધી રહ્યાં છે કોરોના કેસ 
છેલ્લા થોડાક દિવસથી કોરોનાના કેસો રોકેટ ગતિએ વધી રહ્યા છે. જેના કારણે ફરી એક વાર કોરોનાનો ડર સતાવી રહ્યો છે. કોરોનાના કેસો દિલ્હીની સ્કૂલોમાં પણ આવવા લાગ્યા છે. વધતા કેસોને જોઈને ડીડીએમએની બેઠક થઈ હતી. જેમાં દિલ્હીની સ્કૂલોને લઈને કહેવામા આવ્યું છે કે, સ્કૂલો ફરીથી બંધ કરવામાં નહીં આવે, સ્કૂલો માટે એક્સપર્ટ સાથે વાત કરીને SOP જાહેર થશે. સ્કૂલોને ચાલુ કરવા માટે વિસ્તૃત ગાઈડલાઈન ટૂંક સમયમાં જ જાહેર કરવામા આવશે. એટલે કે સ્કૂલો હવે સમગ્રપણે બંધ કરવામાં નહીં આવે. દિલ્હી સરકાર તેના પર ટૂંક સમયમાં ગાઈડલાઈન જાહેર કરશે. આ બેઠકમાં બીજા પણ અન્ય નિર્ણયો કરવામાં આવ્યા છે.