ખાસ વાંચો / બાળકોમાં મલ્ટી ઓર્ગન ઇન્ફ્લેમેટરી સિન્ડ્રોમના કેસો વધ્યા, માત્ર 5 જ દિવસમાં 100 કેસ: જાણો લક્ષણો

• Indian Academy of Pediatric Intensive Careએ રજૂ કર્યો છે રિપોર્ટ
• કયા કયા અંગોને પહોંચાડે છે નુકશાન?
• આ સિન્ડ્રોમના લક્ષણ શું છે? 

Indian Academy of Pediatric Intensive Careએ રજૂ કર્યો છે રિપોર્ટ
Indian Academy of Pediatric Intensive Careએ પોતાનો ડેટા આપતા કહ્યું કે છેલ્લા પાંચ દિવસમાં ઉત્તર ભારતના બાળકોમાં ઓર્ગન ઇન્ફ્લેમેટરી સિન્ડ્રોમના 100 કેસો સામે આવ્યા છે. મુખ્ય સ્વરૂપે આ સિન્ડ્રોમ 4 થી 18 વર્ષના બાળકોમાં જોવા મળી રહ્યા છે. પણ અમુક કેસો એવા પણ સામે આવ્યા છે જેમાં બાળક માત્ર 6 મહિનાનું જ હોય. સાથે જ તેમણે જણાવ્યું છે કે ભારતમાં 26 ટકા તો માત્ર 14 વર્ષના બાળકો છે. 

કયા કયા અંગોને પહોંચાડે છે નુકશાન?
નવી દિલ્હીના ગંગારામ હોસ્પિટલના બાળ ચિકિત્સક ડોકટર ધીરેન ગુપ્તાના જણાવ્યા અનુસાર આ સિન્ડ્રોમ ફેફસા, કિડની અને મગજ સહિતના અંગોને નુકશાન પહોંચાડે છે. ANI સાથેની વાતચીતમાં તેમણે જણાવ્યું હતું કે "હાલ ગંગારામ હોસ્પિટલમાં આવા 10 કેસો સામે આવ્યા છે. જેમાં બાળકોની કિડની, ફેફસા અને મગજને નુકશાન કરી રહ્યા છે. પણ જો આપણે શરૂઆતથી જ આ લક્ષણો ઓળખી લઈએ તો આ રોગનો સમયઅનુસાર ઈલાજ થઈ શકે તેમ છે. ગયા વર્ષે આ સિન્ડ્રોમ સાથે પીડાતા 120 દર્દીઓ હતા જેમાં એકને બાદ કરી બધા જ લોકો સારવારથી સ્વસ્થ થઈ ગયા હતા. 

આ સિન્ડ્રોમના લક્ષણ શું છે?
ડૉક્ટર ગુપ્તાના જણાવ્યા અનુસાર, જો બાળકને ત્રણ થી પાંચ દિવસ સુધી સતત તાવ રહે, પેટમાં દુખાવો થાય તો તે આ સિન્ડ્રોમના મુખ્ય લક્ષણ છે. તેમના કહ્યા મુજબ આ કેસ સૌથી પહેલા પંજાબમાં આવ્યો હતો, ત્યારબાદ મહારાષ્ટ્ર અને દિલ્હીમાં આ કેસો સામે આવવા મંડ્યા હતા. તેમણે સાથે સાથે કહ્યું કે આ સિન્ડ્રોમ વિશે બહુ ચિંતા કરવાની જરૂર નથી, આ સિન્ડ્રોમ ગયા વર્ષે પણ જોવા મળ્યા હતા. એક માતા પિતા તરીકે આપણે એ સમજવાની જરૂર છે કે હાલ જો બાળકોને તાવ આવે કે પછી પેટમાં દુખાવો થાય તો તેને અવગણવા નહીં, સાથે જ આ રોગમાં બળકોને 10 દિવસમાં સારવાર થતાં જ તેઓ સ્વસ્થ થઈ જાય છે, માત્ર 10 ટકા બાળકોને જ સ્વસ્થ થતાં વાર લાગે છે.