સુરતઃ નાની બાળકીઓ પર વધી રહેલી દુષ્કર્મની ઘટના વચ્ચે વધુ એક બાળકીના અપહરણનો પ્રયાસ કરાયો હતો. ભંગાર વાળો એક 10 વર્ષીય બાળકીને વેફરની લાલચ આપી અપહરણ કરવાનો પ્રયાસ કર્યો હતો. પરંતુ લિફ્ટમાંથી અન્ય માણસ બહાર આવતા બાળકી આબાદ બચી ગઈ હતી.
આ બાળકીના અપહરણના પ્રયાસ કરવાની ઘટના સીસીટીવીમાં કેદ થઈ હતી. વાળી ફળિયામાં ખાંડવાળાની શેરીમાં જરીનાં કારખાનામાં કામ કરતા પરિવારની ૧૦ વર્ષીય બાળકી બહાર રોડ પર રમતી હતી. તે દરમિયાન એક ભંગારવાળો લારી લઈને ત્યાંથી પસાર થઇ રહ્યો હતો. લારીમાં તેલના ડબ્બા સહિતના ભંગારની વસ્તુ લઈ જતા ભંગારવાળાની નજર રમી રહેલી બાળા પર પડી હતી. તેને બાળકીને વેફર આપી હતી. વેફરની લાલચ આપ્યા બાદ ચોકલેટ આપવાની વાત કરી હતી. જેથી બાળકી લાલચમાં આવી ગઈ હતી. ભંગારવાળા સાથે ચાલી નીકળી હતી. ખાંડવાળાની શેરીમાંથી ચાલતા ચાલતા તેઓ સામેની શેરીમાં વ્હાઈટ હાઉસ પાસે પહોચી ગયા હતા.
ભંગારવાળાની દાનત ખરાબ હોય તેમ તે પોતાની લારી રોડ પર જ રઝળતી મૂકી બાળાને લઈ ટ્યુશન ક્લાસીસની સામે આવેલા લેબોરેટરી વાળા કોમર્શિયલ કોમ્પ્લેક્ષમાં ચાલ્યો ગયો હતો. એક દોઢ મિનીટ સુધી તે બાળાને અંદર લઈ રહ્યો હતો. તે જ દરમિયાન લીફ્ટમાંથી એક વ્યક્તિ નીચે ઉતરતા જ ભંગારવાળો ગભરાઈ ગયો અને ત્યાંથી ચાલ્યો ગયો હતો. બાળકી પણ દોડીને ભાગી ગઇ હતી.