કરુણાંતિકા / સુરતમાં 10 મહિનાના બાળકનું ફુગ્ગાના કારણે મૃત્યુ, માતા-પિતા માટે લાલબત્તી સમાન કિસ્સો

• સુરતમાં માતા-પિતા માટે લાલબત્તી સમાન કિસ્સો સામે આવ્યો
• 10 મહિનાનું બાળક ફુગ્ગો ગળી જતા થયું મોત
• માતાના હૈયાફાટ રૂદનથી જોનારાં લોકોના કાળજા કંપી ઉઠ્યા

જેમના ઘરે નાના બાળકો હોય તેવા માતાપિતા અને વડીલો માટે ચેતવણીરૂપ કિસ્સો સામે આવ્યો છે.  સુરતમાં રમતા રમતા બાળક ફુગ્ગો ગળી જતા મોતને ભેટ્યું છે. જેના કારણે પરિવાર પર શોકનું મોજું ફરી વળ્યું છે. બાળકના વિલાપમાં માતાના હૈયાફાટ રૂદનથી જોનારાં લોકોના કાળજા કંપી ઉઠ્યા છે.

પાંડે પરિવાર પર આભ તૂટી પડ્યું 
સુરતના ચલથાણ વિસ્તારમાં આવેલી શિવસાંઈ સોસાયટીમાં રહેતા પાંડે પરિવાર પર આભ તૂટી પડ્યું છે. વાસ્તવમાં પાંડે પરિવારનું 10 માસનું બાળક રમતા રમતા ફુગ્ગો ગળી જતાં તેનું મોત નીપજ્યું છે. 

રમતા રમતા મોઢામાં ફુગ્ગો નાખી દીધો
વાસ્તવમાં 10 મહિનાનો આદર્શ પાંડે તેના અઢી વર્ષના ભાઈ પ્રિયંસુ પાંડે સાથે રમી રહ્યો હતો. આ દરમિયાન તેણે રમતા રમતા મોઢામાં ફુગ્ગો નાખી દીધો હતો. જેનું રબર માસુમના ગળામાં ફસાઈ જતાં તે જોરજોરથી રડવા લાગ્યો હતો. આદર્શનો રડવાનો અવાજ સાંભળી માતા ફુલકુમારીબેન પાંડે રસોડામાંથી દોડી આવી હતી. જ્યાં અઢી વર્ષના પ્રિયંસુએ આદર્શ ફુગ્ગો ગળી ગયો હોવાનું માતાને જણાવ્યું હતું. 

પાંચ જેટલી જુદી-જુદી હોસ્પિટલોમાં ગયા  
જેથી તેઓ તાત્કાલિક બાળકને લઈને હોસ્પિટલ ખાતે દોડી ગયા ગતા.  તેઓ 10 માસના બાળકના ગળામાંથી રબર બહાર કઢાવવા આસપાસની પાંચ જેટલી હોસ્પિટલોમાં ગયા હતા. પરંતુ બાળકના ગળામાં ચોંટેલું રબર બહાર ન નીકળતા અંતે તેઓ સિવિલ હોસ્પિટલ ખાતે પહોંચ્યા હતા. 

મોતના સમાચારથી પરિવારમાં શોક
જ્યાં ફરજ પર હાજર તબીબીએ બાળકને મૃત જાહેર કર્યું હતું. બાળકના મોતના સમાચાર મળતા પરિવાર પર શોકનું મોજુ ફરી વળ્યું હતું. તો 7 માસના બાળકના વિલાપમાં માતાના આક્રંદથી સિવિલ પરિસર ધ્રુજી ઉઠ્યું હતું.