ધરપકડ / 26મી જાન્યુઆરી પહેલા વડોદરાથી ઝડપાયો શંકાસ્પદ આતંકવાદી, કેટલાક દિવસથી હતો ગુજરાતમાં...

• વડોદરા પાસે શંકાસ્પદ કામગીરી કરતો હતો શખ્સ
• ગોરવા વિસ્તારમાંથી ઝફર અલી નામનો શખ્સ ઝડપાયો
• ઝડપાયેલો શખ્સ ISIS સાથે સંકળાયેલો હોવાની માહિતી

ઝફર અલી ગુજરાતમાં રહીને સંગઠન રચવાની ફીરાકમાં હતો. આતંકવાદી ઝફર અલી 5-10 દિવસથી ગુજરાતમાં જ હતો. શખ્સ આતંકી હુમલાનું પણ પ્લાનિંગ કરી રહ્યો હતો. આતંકવાદી ઝફર અલી તમિલનાડુનો રહેવાસી છે.

ATSએ ગઈકાલ રાતથી વડોદરામાં ધામા નાખ્યા હતા. ATSને 6 આતંકી તમિલનાડુ છુપાયાની બાતમી મળી હતી. 6માંથી 5 આતંકીઓની તમિલનાડુમાં ધરપકડ થઈ હતી. આતંકી ઝફર અલી તમિલનાડુથી ફરાર થયો હતો.

ISISના વિચારોનો કરી રહ્યો હતો પ્રચાર-પ્રસાર

આ શંકાસ્પદ આતંકવાદી ઝફર જંબુસર વિસ્તારમાં એક ખંઢેર જેવી ઓરડીમાં રહેતો હતો. તેના પાડોશમાં રહેતા લોકો તેના વિશે કંઇ ન જાણતા હોવાનું કહી રહ્યા છે. ત્યારે આ આતંકવાદી ISISના વિચારો અને પ્રવૃત્તિઓનો પ્રચાર પ્રસાર કરી રહ્યો હતો. 

સ્થાનિકો આ વ્યક્તિથી અજાણ?

જોકે આ મામલે હજુ સ્થાનિક પોલીસને જાણ નથી. પરંતુ આ આતંકી કેવી રીતે અહીં રહેતો હતો, કોણે કોણે તેને મદદ કરી, કોને કોને તે મળ્યો અને અહીં આશરો કોણે આપ્યો આ તમામ મુદ્દે તપાસ થશે. જોકે, 26મી જાન્યુઆરી પહેલા આ આતંકવાદી મળવો ખુબ મોટી વાત છે. આ મોટું ષડયંત્ર ગોઠવવા માટે અહીં આવ્યો હોવાનું અનુમાન લગાવાય રહ્યું છે.

આજે દિલ્હીમાંથી ત્રણ આતંકવાદી ઝડપાયા

મહત્વનું છે કે, આજે દિલ્હી પોલીસના સ્પેશિયલ સેલે આઇએસઆઇએસ (ISIS)ના ત્રણ આતંકીઓની ધરપકડ કરી હતી. ત્રણેય આતંકીઓની ધરપકડ એન્કાઉન્ટર બાદ વજીરાબાદથી કરવામાં આવી હતી. તેમની પાસેથી હથિયાર જપ્ત કરવામાં આવ્યા છે. હાલ તો દિલ્હી પોલીસની સ્પેશિયલ સેલ આ ત્રણેય આતંકીઓની પૂછપરછ કરી રહી છે.