શોધ / અમદાવાદના યુવાનોએ બનાવી અનોખી ઇલેક્ટ્રીક સાયકલ, 1kmનો ખર્ચ 30 પૈસા

• અમદાવાદી યુવાનોની અનોખી સિદ્ધિ
• કરકસર સાથે કસરત પણ થશે
• ઈલેક્ટ્રિક સાયકલ પર ટ્રેડ મીલ પણ ગોઠવ્યું

અમદાવાદના યુવાનોએ એક અનોખી ઈલેક્ટ્રીક સાયકલનું ઈનોવેશન કર્યું છે જે સ્પિડથી એક સ્થળેથી બીજા સ્થળે જવા ઉપયોગી તો બનશે પરંતુ તેની સાથે સાથે સાયકલ પર કસરત પણ કરી શકાશે. આ અનોખી સાયકલ પર ટ્રેડ મીલ ગોઠવવામાં આવ્યું છે જેથી જ્યારે વ્યક્તિ એક સ્થળેથી બીજા સ્થળે સાયકલ લઈને જતો હોય તે દરમિયાન તે સાયકલ પર ઉભા રહીને ટ્રેડમીલ પણ કરી શકશે.

30 થી 40ની સ્પીડે 70 કીલોમિટર સુધી ચાલે છે
આજે L.D કોલેજ કેમ્પસ ખાતે કનેક્ટ સ્ટાર્ટઅપ ડોટ્સનું આયોજન થયુ હતુ જેમાં એક ટીમ દ્વારા ઈલેક્ટ્રીક સાયકલ રજુ કરાઈ હતી જેનો ઉપયોગ બેસીને ચલાવવા માટે, ઉભા રહીને ચલાવવા માટે અને ટ્રેડ મીલ કરવા માટે એમ ત્રણ રીતે ઉપયોગી થઈ શકે તેવો હતો. ઈનોવેટર્સના ગ્રુપ દ્વારા આ અનોખી સાયકલને બનાવતા મહિનાઓ લાગ્યા અને આખરે સફળતા મળતા આવનાર સમયમાં આ સાયકલ ખુબજ ઉપયોગી થઈ શકશે. આ સાયકલમાં બેટરી લગાવવામાં આવી છે જે એક વાર ચાર્જ કર્યા બાદ 70 કીલોમિટર સુધી ચાલે છે અને 30 થી 40ની સ્પિડે સાયકલ ચાલે છે જેથી કરીને ઓફિસ આવવા-જવા માટે આ સાયકલ ખુબ ઉપયોગી બનશે. એટલુ જ નહીં ઓફિસ જતા જતા સાયકલ ઉપર ટ્રેડમિલ પણ થઈ શકશે.

ટ્રેડમીલ પણ થઈ શકશે
આ ઈલેકટ્રીક સાયકલ પ્રતિકિમી માત્ર 30 થી 40 પૈસાના ખર્ચે ચાલે છે અને હેલ્થ સાચવવાની સાથે સાથે સ્પિડથી ઓફિસ પહોંચવા અને શહેરને પ્રદુષણ મુક્ત રાખવા માટે ખુબ જ ઉપયોગી છે. ઈનોવેશન ક્ષેત્રમાં અત્યાર સુધી અનેક ઈલેક્ટ્રીક બાઈક્સ શોધાયા હશે પરંતુ વ્હીકલ ઉપર એક સ્થળેથી બીજા સ્થળે પહોંચવાની સાથે સાથે ટ્રેડમીલ પણ થઈ જાયે તેવુ આ પ્રથમ ઈનોવેશન છે.