કિસ્સો / કાઉન્સિલરની આ તરકીબથી 30 મિનિટમાં 1 વર્ષના પ્રેમનો ભ્રમ તૂટ્યો અને યુવતીનું જીવન બચ્યું

• માતા પિતાએ મહિલા હેલ્પલાઈન 181ની મદદ માંગી
• રશ્મિની હાજરીમાં જ પીન્ટુંએ લગ્ન કરવાની ના પાડી દીધી
• રીટાબેનની સમજણ કામમાં આવી રશ્મિની સામે જ પીન્ટુનું સત્ય સામે આવ્યું

રશ્મિનો પરિવાર આર્થિક રીતે સુખી હતો. રશ્મિના પિતા સરકારી ખાતામાં અધિકારી અને માતા પણ સરકારી યોજનામાં સક્રિય કાર્યકર હતા. રશ્મિને ભણવામાં જરાય મન ન હોવાથી પરિવારની ના છતાં તેણે ધો. 10 પછી અભ્યાસ છોડી દીધો અને પોતાના ખેતરમાં કામ કરવા જતી. તેના ખેતરનો રસ્તો પીન્ટુના ઘર પાસેથી પસાર થતો. પીન્ટુ રશ્મિનો પીછો કરતો, વારંવાર તેને પ્રેમ કરતો હોવાની વાત કરતો. આ રીતે તેઓ એકબીજાના સંપર્કમાં આવ્યા. 1 વર્ષ પહેલા પીન્ટુએ રશ્મિને પ્રપોઝ કરી કહ્યું હું તને ખૂબ પ્રેમ કરું છું. હું મોટી કંપનીમાં મેનેજર છું અને 50 હજાર કામઉ છું. તને ખૂશ રાખીશ.’
ત્યારે 17 વર્ષની રશ્મિ તેની વાતોમાં ભોળવાઈ ગઈ. બદ ઈરાદા ધરાવતા પીન્ટુએ તેને પ્રેમની આડમાં પીંખી નાંખી, પણ કાચી ઉંમરની રશ્મિ તેને પ્રેમ સમજતી રહી. 

માતાપિતાને આ અંગે જાણ થતાં દીકરીને સમજાવવાનો પ્રયત્ન કર્યો. જોકે પ્રેમમાં અંધ રશ્મિ કંઈ જ સમજવા તૈયાર નહોતી. અંતે તેના માતા પિતાએ મહિલા હેલ્પલાઈન 181ની મદદ માંગી. 181ના મહિલા કાઉન્સિલર રીટાબહેન તેમની મદદે પહોંચ્યા. રશ્મિ કંઈ જ સમજવા તૈયાર નહોતી. જેથી રીટા બહેને એક તરકીબ વિચારી પીન્ટુને બોલાવ્યો અને તેને આજે ને આજે 18 વર્ષની થઈ ચૂકેલી રશ્મિ સાથે લગ્ન કરવા કહ્યું. 

રશ્મિની હાજરીમાં જ પીન્ટુંએ લગ્ન કરવાની ના પાડી દીધી અને કહ્યું કે ‘હું કંઈ તને પ્રેમ નથી કરતો. તારા જેવી તો કેટલીય છોકરીઓને ફેરવું છે. મને તો બસ તારી સાથે શારીરિક સંબંધ બનાવવો હતો અને એટલે જ મે મારા મેનેજર હોવાનું,  સારો પગાર હોવાનું અને તને પ્રેમ કરતો હોવાનું કહ્યું. બાકી હું ડ્રાઈવર છું.’

રીટાબેનની સમજણ કામમાં આવી રશ્મિની સામે જ પીન્ટુના મોઢે સત્ય ઓકાતા રશ્મિને ભાન થયું. 1 વર્ષનો પ્રેમ 30 મિનિટમાં ભ્રમ સાબિત થયો. અંતે રીટાબહેને પીન્ટુ પાસે બાંહેધરી લીધે કે તે રશ્મિ સાથે કોઈ સંબંધ નહીં રાખે.  

(પાત્રોના નામ બદલેલ છે.)
સ્ટોરી : ધર્મિષ્ઠા પટેલ, મુંબઈ