પ્રેમીઓ પાગલ હોય છે, આ ઉક્તિ મુજબ, પાગલ પ્રેમીઓ અવારનવાર ઉટપટાંગ હરકતો કરતા હોય છે. સામાન્ય રીતે પત્ની કે પતિ પોતાના જીવનસાથી કેટલો પ્રેમ કરે છે તે મહેસુસ કરતાં હોય છે પરંતુ ક્યારેક કોઇ પ્રેમી કે પતિ આ માટે અજીબ રીતે પણ વર્તતા જોવા મળે છે. આવો જ એક કિસ્સો ભુજમાં બન્યો હતો.
પાગલ પ્રેમીએ પોતાના જ અપહરણનું નાટક કરીને પત્નીનો પ્રેમ ચકાસવાનો કર્યો પ્રયોગ
મોબાઇલમાં વોઇસ ચેન્જર એપ્લિકેશનથી અવાજ બદલીને પત્નીને કરતો હતો ફોન
બીજા દિવસે ફરી ઇશાને ખંડણી માટે ફોન આવતા પોલીસે લોકેશન શોધી લીધું
ભુજમાં પત્ની પોતાને કેટલો પ્રેમ કરે છે તે જોવા માટે પતિએ પોતાના જ અપહરણનું નાટક કરી, વોઇસ ચેન્જર એપ્લીકેશન વાપરીને, અવાજ બદલીને પત્નીને ફોન કર્યો હતો. પત્નીએ પોલીસને જાણ કરતાં પોલીસે તેને ગણતરીના સમયમાં જ પકડીને આખા નાટક પરથી પડદો ઉંચક્યો હતો.
અજાણ્યા નંબર પરથી ફોન આવ્યો કે, 'તારો પતિ મારા કબજામાં છે...'
ભુજના હોસ્પિટલ રોડ પરના સોમનાથ એપાર્ટમેન્ટમાં રહેતા મેહુલ રસીકલાલ જોષીના પત્ની ઇશા પર અજાણ્યા નંબર પરથી ફોન આવ્યો કે, ‘તારો પતિ મારા કબજામાં છે જો જીવતો જોઇતો હોય તો રૂા. ત્રણ લાખ લઇને ગાંધીધામ આવી જા.’ ફોન આવતા ગભરાઇ ગયેલી પત્નીએ પોલીસને જાણ કરી હતી.
મૂળ મહારાષ્ટ્રના અમરાવતીની રહેવાસી ઇશા સંજયભાઇ પટેલે પોલીસને જણાવ્યા મુજબ, તેનો પતિ મેહુલ રસિકલાલ જોષી (મૂળ રહેવાસી માધાપર) તા. 15મી ઓક્ટોબરના રોજના સમયે ઓફિસે જવાનું કહીને ઘરેથી નિકળ્યો હતો. થોડા સમયમાં જ અજાણ્યા નંબર પરથી અપહરણની વાત કરીને પૈસા માગતો ફોન આવ્યો હતો.
બીજા દિવસે ફરી ઇશાને ખંડણી માટે ફોન આવતા પોલીસે લોકેશન શોધી લીધું
ત્યાર બાદ ઇશાએ મેહુલના માતાપિતાને જાણ કરતાં બધાએ સાંજે પોલીસમાં ફરિયાદ નોંધાવી હતી. જેના આધારે પોલીસે ત્રણ ટીમો પાડીને મોબાઇલ સર્વેલન્સમાં મુક્યો હતો. જેમાં ફોનનું લોકેશન ગાંધીધામનું આવતા પોલીસ ગાંધીધામ પહોંચી હતી. અહીંના એક ગેસ્ટહાઉસમાં યુવાન રોકાયો હોવાનું પણ જાણવા મળ્યું હતું. બીજા દિવસે ફરી ઇશાને ખંડણી માટે ફોન આવતા પોલીસને ફોનનું લોકેશન ગાંધીધામથી ભુજ આવતું જાણવા મળ્યું હતું. ફોન ભુજ નજીક ટ્રેસ થતાં પોલીસે ફોનધારકને પકડી લેતા, તે તો ઇશાનો પતિ મેહુલ જ નિકળ્યો હતો. પોલીસે તેને પકડી લીધો હતો. આમ ખ્યાલ આવ્યો કે અપહરણકર્તા અન્ય કોઇ નહીં પણ જેનું અપહરણ થયું હોવાનું મનાતું હતું તે પોતે જ હતો.
મોબાઇલમાં વોઇસ ચેન્જર એપ્લીકેશનથી અવાજ બદલીને પત્નીને કરતો હતો ફોન
પોલીસ પૂછપરછ દરમિયાન મેહુલે જણાવ્યું હતું કે, પારિવારિક સમસ્યાઓને કારણે પોતે અસ્વસ્થ બન્યો હતો. વળી તેને પત્ની કેટલો પ્રેમ કરે છે તે પણ ચકાસવું હતું. આથી તેણે આ તરકટ રચ્યું હતું. મોબાઇલમાં વોઇસ ચેન્જર એપ્લીકેશનની મદદથી તે પોતે જ અવાજ બદલીને પત્નીને ફોન કરતો હતો. પોલીસે તેના વિરૂદ્ધ પોલીસને ગેરમાર્ગે દોરવાની અને હેરાનગતિ કરવાની ફરિયાદ નોંધાવી આગળની કાર્યવાહી હાથ ધરી હતી.