ગોટાળો / VIDEO: સુરતમાં સ્ટ્રોંગ રૂમને બદલે EVM મશીન અને બેલેટ પેપર બોક્સ અહીં કેમ મૂકાયા, કોંગ્રેસના આરોપથી ખળભળાટ

• સુરતમાં કોંગ્રેસ દ્વારા ગંભીર આક્ષેપ 
• બેલેટ પેપર બોક્સ ચૂંટણી અધિકારીની ઓફિસમાં હોવાના આક્ષેપ
• બોક્સ સ્ટ્રોંગ રૂમની બદલે અધિકારીની ઓફિસમાં રખાયા 

સુરતમાં કોંગ્રેસના કાર્યકરો બહુમાળી ભવનમાં પહોંચ્યા હતા. જયાં 4 માળે ઓફિસના દરવાજા ખોલાવીને બેલેટ પેપર ખુલ્લામાં પડ્યા હોવાનો આક્ષેપ કર્યો છે. કોંગ્રેસના કાર્યકરોએ કહ્યું કે, જે બેલેટ પેપર સ્ટ્રોંગરૂમમાં હોવા જોઈએ. તે ઓફિસમાં રાખવામાં આવ્યા છે. તેનો દુરુપયોગ થવાની આશંકા પણ દર્શાવી છે. સાથે કેટલાક EVM મશિન પણ જોવા મળ્યા હતા. હાજર અધિકારીઓએ બોલવાની મનાઈ કરી દીધી હતી. 

જિલ્લા કલેક્ટરની VTV સાથે વાતચીત

કોંગ્રેસના કાર્યકરોના હોબાળા બાદ કલેક્ટર પણ પહોંચ્યા હતા. જ્યાં કલેક્ટર દ્વારા આ અંગે કહેવાયું કે, પોસ્ટલ બેલેટ રોજ પોસ્ટ વિભાગ દ્વારા પ્રાપ્ત થાય છે. અને તે ROની કસ્ટડીમાં રહે છે. આવતીકાલે પણ જે પોસ્ટ દ્વારા બેલેટ પેપર આવશે તે સ્વીકારવામાં આવશે. બેલેટ પેપરના શીલિંગ મામલે કલેક્ટરે કહ્યું કે, એવી કોઈ સૂચના નથી. તે પેટીમાં હોય છે અને ROની કસ્ટડિમાં હોય તે યોગ્ય જ છે.

EVM મશિન મામલે કલેક્ટરનું નિવેદન

બેલેટ પેપરની સાથે કેટલાક EVM પણ મળી આવ્યા હતા. જે મામલે પણ કોંગ્રેસે હોબાળો કર્યો હતો. હાજર અધિકારીઓએ EVM મામલે કહ્યું કે, આ મશિન લોકોને નિદર્શન કરાવવા માટે હતા. તેનો ઉપયોગ ચૂંટણીમાં કરવામાં આવ્યો નથી. કલેક્ટરે પણ આ મામલે કહ્યું કે, તે મશિન સ્ટ્રોંગ રૂમમાં રાખવામાં આવતા નથી. કારણ કે, સ્ટ્રોંગ રૂમમાં જો વધારાના મશિન મળે તો, અન્ય વિવાદ થઈ શકે છે. 

EVM મશિન, બેલેટ પેપર પર ખુલાસો પરંતુ બેલેટ પેપર બોક્સ પર કોઈ જવાબ નહીં

સુરતમાં કોંગ્રેસના ઉમેદવાર દ્વારા બહુમાળી ભવનમાંથી બેલેટ પેપર મળી આવવાનો આક્ષેપ કરાયો છે. જે મામલે કલેક્ટરે ખુલાસો કર્યો હતો. પરંતુ ચૂંટણીમાં કાર્યરત અધિકારીઓનું મતદાન પહેલા થઈ જાય છે. તે બેલેટ પેપરની 2 પેટી પણ બહુમાળી ભવનમાં મળી આવી છે. જે મામલે કલેક્ટર દ્વારા પણ કોઈ સ્પષ્ટ ખુલાસો કરાયો નથી. જે પેટી સ્ટ્રોંગ રૂમમાં હોવી જોઈએ. તે પેટી અધિકારીઓની કચેરીમાં છે. જે સમગ્ર મામલે કોંગ્રેસે આક્ષેપ કર્યા છે.