કોરોના વાયરસ કાળમાં વિશ્વ સ્વાસ્થ્ય સંગઠને ગરીબ દેશોમાં વધુમાં વધુ ટેસ્ટ થઇ શકે તે માટે મોટો નિર્ણય લીધો છે.
વિશ્વભરમાં કોરોના વાયરસના કુલ કેસ ત્રણ કરોડને પાર
ગરીબ દેશોને 12 કરોડ ટેસ્ટ કિટ ઉપલબ્ધ કરાવશે વિશ્વ સ્વાસ્થ્ય સંગઠન
પાંચ ડોલર પ્રતિ યુનિટની કિંમત પર મળશે આ રેપિડ ટેસ્ટ
જ્યાં સુધી વેક્સિન ન મળે ત્યાં સુધી ટેસ્ટિંગ અને નિયમ પાલન જ સૌથી મોટું હથિયાર
કોરોનાકાળમાં વધુમાં વધુ ટેસ્ટિંગ ખૂબ આવશ્યક
કોરોના વાયરસના કારણે દુનિયામાં દર્દીઓની સંખ્યામાં સતત વધારો થઇ રહ્યો છે અને બધા જ દેશો દ્વારા વધુમાં વધુ ટેસ્ટ કરવા પર ભાર મૂકવામાં આવી રહ્યો છે. જ્યાં સુધી કોરોના વાયરસ સામે રસી મળી જતી નથી ત્યાં સુધી માસ્ક અને સામાજિક અંતરની સાથે સાથે વધુમાં વધુ ટેસ્ટ ખૂબ આવશ્યક છે. એવામાં એવા ગરુબ દેશો જે અત્યારે વધારે ટેસ્ટ કિટ આર્થિક પરિસ્થિતિના કારણે કરી શકતા નથી તેમના માટે વિશ્વ સ્વાસ્થ્ય સંગઠન આગળ આવ્યું છે. વિશ્વ સ્વાસ્થ્ય સંગઠન દ્વારા સસ્તા ભાવ પર 12 કરોડ જેટલી રેપિડ ટેસ્ટ કિટ આપવામાં આવશે.
સંક્રમણને રોકવા ટેસ્ટ જરૂરી
દુનિયાભરમાં કોરોના વાયરસના કેસમાં સતત વધારો થઇ રહ્યો છે અને કુલ કેસની સંખ્યા ત્રણ કરોડને પાર થઇ ગઈ છે. કોરોના વાયરસને રોકવા માટે અત્યાર સુધી કોઈ પણ કારગર દવા શોધી શકાઈ નથી. એવામાં જો કોરોના સામે લડવું હોય તો એકમાત્ર વિકલ્પ છે વધુમાં વધુ ટેસ્ટ કરો અને દર્દીને આઈસોલેટ કરો, માત્ર આ કામથી જ કોરોના વાયરસના સંક્રમણને રોકી શકાય તેમ છે.
ગરીબ દેશોને રેપિડ કિટ ઉપલબ્ધ કરાવશે WHO
આ દરમિયાન વિશ્વ સ્વાસ્થ્ય સંગઠનનાં મહાનિદેશક ટેડ્રોસે સંમેલનમાં કહ્યું કે કોરોના વાયરસના આશરે 12 કરોડ રેપિડ ટેસ્ટ નિમ્ન અને માધ્યમ આવક ધરાવતા ગરીબ દેશોને 5 ડોલર પ્રતિ યૂનિટના ભાવ પર આપવામાં આવશે. આ રેપિડ ટેસ્ટ ઉપલબ્ધ કરાવવા માટે કોરોના ટેસ્ટ કિટનું નિર્માણ કરતી કંપની અને બિલ-મેલિંડા ગેટ્સ ફાઉન્ડેશન વચ્ચે સહમતી વ્યક્ત કરવામાં આવી છે અને આગામી છ મહિનામાં આ ટેસ્ટ કિટ આપવામાં આવશે. આ કિટ 133 દેશોને આપવામાં આવશે અને આ કિટમાં 15થી 30 મિનીટમાં રિપોર્ટ આવી જશે.