ચિંતાજનક / કોરોનાના નવા વેરિયન્ટથી દુનિયા ટૅન્શનમાં: WHOએ કહ્યું- ઓમિક્રોનને લીધે આ દેશમાં આવી શકે મોટું 'તોફાન'

• WHOના કોરોનાના નવા વેરિયન્ટ ઓમિક્રોનની લહેર અંગે ચેતવણી આપી 
• ઓમિક્રોનનું સંક્રમણ યુરોપિયન ખંડના ઓછામાં ઓછા 38 સભ્ય દેશોમાં જોવા મળ્યું છે.
• WHOના વડાએ ક્રિસમસની ઉજવણી રદ કરવાની અપીલ કરી 

WHOના કોરોનાના નવા વેરિયન્ટ ઓમિક્રોનની લહેર અંગે ચેતવણી આપી 

યુરોપમાં વિશ્વ આરોગ્ય સંસ્થા (WHO)ના ટોચના અધિકારીએ મંગળવારે ઓમિક્રોન વેરિઅન્ટને કારણે સમગ્ર યુરોપિયન ખંડમાં કોરોનાવાયરસના કેસોમાં "નોંધપાત્ર વધારો" માટે સરકારોને તૈયાર રહેવા જણાવ્યું હતું. ઓમિક્રોન પહેલાથી જ ઘણા દેશોમાં પ્રભુત્વ ધરાવે છે. ડબ્લ્યુએચઓના સ્થાનિક નિર્દેશક, ડો. હંસ ક્લુઝે, વિયેનામાં એક પ્રેસ કોન્ફરન્સમાં જણાવ્યું હતું કે, "અમે બીજું તોફાન નજીક આવતા જોઈ શકીએ છીએ."

ઓમિક્રોનનું સંક્રમણ યુરોપિયન ખંડના ઓછામાં ઓછા 38 સભ્ય દેશોમાં જોવા મળ્યું છે.

WHOના સ્થાનિક નિર્દેશક, ડો. હંસ ક્લૂઝ કહ્યું કે, કેટલાક સપ્તાહમાં ઓમિક્રોન મહાદ્વીપના અન્ય દેશોમાં હાવી થઈ જશે, જેના કારણે પહેલાથી જ ખરાબ સમયમાંથી પસાર થઈ રહેલી આરોગ્ય પ્રણાલી વધુ પ્રભાવિત થશે. તેમણે કહ્યું કે ઓમિક્રોન યુરોપિયન ખંડના ઓછામાં ઓછા 38 સભ્ય દેશોમાં જોવા મળ્યું છે. બ્રિટન, ડેનમાર્ક અને પોર્ટુગલમાં તે પહેલાથી જ પ્રભુત્વ ધરાવે છે.તેમણે કહ્યું કે સમગ્ર યુરોપિયન યુનિયનમાં ગયા અઠવાડિયે કોરોના વાયરસના કારણે 27 હજાર લોકોના મોત થયા હતા અને 26 લાખ વધારાના કેસ નોંધાયા હતા.જો કે, આ કેસોમાં તમામ વેરિયન્ટના કેસોનો સમાવેશ થાય છે. તેમણે કહ્યું કે આ સંખ્યા ગયા વર્ષના આ સમયગાળા કરતા 40 ટકા વધુ છે.ક્લૂઝેએ કહ્યું,'કોવિડ -19 કેસની વધતી સંખ્યાના પરિણામે, વધુ લોકોને હોસ્પિટલમાં દાખલ કરવા પડી શકે છે.

WHOના વડાએ ક્રિસમસની ઉજવણી રદ કરવાની અપીલ કરી 

નોંધનીય છે કે આ પહેલા પણ WHO ચીફ ડો. ટેડ્રોસ એડહાનોમે કહ્યું હતું કે, "ઇવેન્ટને રદ્દ કરવી એ જીવને જોખમમાં નાખવા કરતાં વધુ સારું છે. હવે મુશ્કેલ નિર્ણયો લેવા પડશે. જેનો અર્થ છે કે કેટલાક કિસ્સાઓમાં ઉજવણીને રદ કરવી પડશે. અથવા તારીખ લંબાવી પડશે. હવે આપણી પાસે મજબૂત પુરાવા છે કે ઓમિક્રોન ડેલ્ટા કરતા વધુ ઝડપથી ફેલાય છે."ઉલ્લેખનીય છે કે આ સમયે સમગ્ર વિશ્વ ક્રિસમસ અને નવા વર્ષની તૈયારીમાં વ્યસ્ત છે. પરંતુ છેલ્લા મહિનાથી, યુરોપના ઘણા દેશો કોવિડના નવા સંક્રમણ સામે લડી રહ્યા છે.