- વોટ્સએપે નવેમ્બરમાં લાખો એકાઉન્ટ બંધ કર્યા
- ગેરકાયદેસર પ્રવૃત્તિઓને રોકવા પર ધ્યાન કેન્દ્રિત
- નિયમો વિરુધ્ધ પ્રવૃત્તિઓ કરનારના એકાઉન્ટ બંધ
ઇન્સ્ટન્ટ મેસેજિંગ પ્લેટફોર્મ વોટ્સએપે નવેમ્બર મહિનામાં લાખો ભારતીય એકાઉન્ટ પર પ્રતિબંધ મૂક્યો હતો. મેસેજિંગ પ્લેટફોર્મનો તાજેતરનો રિપોર્ટ દર્શાવે છે કે વોટ્સએપે 1 નવેમ્બરથી 30 નવેમ્બર સુધી 37 લાખથી વધુ એકાઉન્ટ પર પ્રતિબંધ મૂક્યો છે. વોટ્સએપે ઓક્ટોબર મહિનામાં પણ લાખો એકાઉન્ટ્સ પર સમાન પ્રતિબંધ લાગુ કર્યો હતો, પરંતુ તે સમયે એકાઉન્ટ્સની સંખ્યા વર્તમાન સંખ્યા કરતા 2 લાખ ઓછી હતી.
37 લાખથી વધુ એકાઉન્ટ પર પ્રતિબંધ
રિપોર્ટમાં સ્પષ્ટ કહેવામાં આવ્યું છે કે 37 લાખથી વધુ એકાઉન્ટ પર પ્રતિબંધ લગાવવામાં આવ્યો છે. તેમાંથી 9 લાખ 90 હજાર એકાઉન્ટ એવા છે, જેને કોઈ પણ યુઝર દ્વારા જાણ કરતા પહેલા જ પ્રતિબંધિત કરી દેવામાં આવ્યા હતા. ભારતમાં લાખો એકાઉન્ટ્સ પર પ્રતિબંધ મૂકવા અંગે, WhatsApp પ્રવક્તાએ જણાવ્યું હતું કે કંપની એન્ડ-ટુ-એન્ડ એન્ક્રિપ્ટેડ મેસેજિંગ સેવાઓમાં દુરુપયોગને રોકવામાં અગ્રેસર છે. વર્ષોથી, કંપનીએ તેના પ્લેટફોર્મ પર વપરાશકર્તાઓને સુરક્ષિત રાખવા માટે આર્ટિફિશિયલ ઇન્ટેલિજન્સ અને અન્ય અદ્યતન તકનીકો, ડેટા વૈજ્ઞાનિકો અને નિષ્ણાતો અને પ્રક્રિયાઓમાં સતત રોકાણ કર્યું છે.
ગેરકાયદેસર પ્રવૃત્તિઓને રોકવા પર ધ્યાન કેન્દ્રિત
કંપનીએ કહ્યું કે તે પ્લેટફોર્મ પર ખરાબ વર્તનને રોકવા માટે સાધનો અને સંસાધનોનો ઉપયોગ કરે છે. તેમણે વધુમાં કહ્યું કે ગેરકાયદેસર પ્રવૃત્તિઓને રોકવા પર ધ્યાન કેન્દ્રિત કરવામાં આવ્યું છે, કારણ કે કોઈને નુકસાન થાય તે પહેલાં તેને અટકાવવું વધુ સારું છે. આ WhatsApp એકાઉન્ટ્સને ઇન્ફોર્મેશન ટેક્નોલોજી (મધ્યસ્થી માર્ગદર્શિકા અને ડિજિટલ મીડિયા આચાર સંહિતા) નિયમો, 2021ના નિયમ 4(1)(d) હેઠળ પ્રતિબંધિત કરવામાં આવ્યા હતા.
ખોટી માહિતી ફેલાવનાર એકાઉન્ટ બંધ
વોટ્સએપની આ કાર્યવાહી બાદ કંપનીએ એકાઉન્ટ્સ પર પ્રતિબંધ કેમ મૂક્યો તે અંગે સવાલો ઉઠી રહ્યા છે. આના પર, વારંવાર સ્પષ્ટતા કરવામાં આવી છે કે તે એવા એકાઉન્ટ્સને પ્રતિબંધિત કરે છે જે કંપનીની નીતિઓ અને માર્ગદર્શિકાનું ઉલ્લંઘન કરે છે. જેમાં વોટ્સએપ પર ખોટી માહિતી ફેલાવવી, બહુવિધ નંબરો પર અનવેરિફાઈડ મેસેજ મોકલવા જેવી બાબતોનો સમાવેશ થાય છે. વર્ષોથી, WhatsApp એ લિંકને વેરિફાય કરવા, ફોરવર્ડ મેસેજીસને મર્યાદિત કરવા વગેરે સહિત અનેક પહેલ કરી છે. મેસેજિંગ પ્લેટફોર્મ ફોરવર્ડ કરેલા મેસેજને પણ ઘણી વખત માર્ક કરે છે, જે મોટા ભાગના કિસ્સાઓમાં નકલી સાબિત થાય છે. જો કોઈ પણ એકાઉન્ટ આવી કોઈપણ પ્રવૃત્તિમાં સામેલ હોય તો વોટ્સએપ તે એકાઉન્ટને પ્રતિબંધિત કરી દે તેવી શક્યતાઓ છે.
