જિંદગીમાં એવા પણ દિવસો આવે છે જ્યારે એવું લાગે છે કે કામનો કંટાળો આવવા લાગે છે નોકરી બદલવાની જરૂરિયાત પણ ઉભી થાય છે જોકે પછી એવુ લાગે છે કે જૂની નોકરી જ સારી હતી. આથી જે દિલની વાત સાંભળીને કમબેક કરે છે અને ટોપ પર પહોંચે છે. તે જ ચેમ્પિયન કહેવાય છે. આવું જ થયું ઈન્ટરનેશનલ ક્રિકેટર શિખર ધવન સાથે. મોટાભાગના લોકો એ વાતથી અજાણ હશે કે એક સમય એવો આવ્યો હતો જ્યારે ધવને ક્રિકેટ છોડ્યુ હતુ અને પોતાના માસાને ત્યાં નોકરી કરવા લાગ્યો હતો.
આ વાતનો ખુલાસો શિખરે એક ઇન્ટરવ્યૂમાં કર્યો. ફેન્સ વચ્ચે ગબ્બરના નામથી ફેમસ આ ખેલાડીએ પોતાના શરૂઆતના ક્રિકેટના દિવસોમાં યાદ કરતા જણાવ્યુ કે ''2001માં દિલ્હી માટે પહેલીવખત અંડર 15 ટીમમાં રમ્યો હતો. બે મેચ પછી મને ડ્રોપ કરાયો હતો.'' ક્રિકેટ છોડવાના નિર્ણય વિશે તેણે જણાવ્યુ કે ''તે સમયે મેં વિચાર્યુ હતુ અને હું કંઇક કરી લઇશ. મારા માસાને બોક્સ (શૂઝ બોક્સ) બનાવવાનો બિઝનેસ છે. હું તેમની બહાદુરગઢની ફેક્ટરીમાં નોકરી માટે ગયો હતો.''
પોતાની પહેલી નોકરી વિશે ધવને જણાવ્યુ કે મારુ કામ માત્ર સેલ્સમેન સાથે બોક્સ પકડીને ઉભુ રહેવાનુ જ હતુ. આ કામ મેં એક-બે દિવસ કર્યું પરંતુ પછી મારાથી રહેવાયું નહીં. હું ફરીથી રમવા માટે મેદાનમાં ઉતર્યો હતો. મને હંમેશાથી સંઘર્ષ પસંદ છે. પછી તે ક્રિકેટ ટીમમાંથી બહાર રહેવાનુ હોય કે પછી લાંબુ અંતર કાપીને સ્ટેડિયમ પહોંચવાનું હોય. નોંધનીય છે કે શિખર ધવન IPLમાં કમબેક કર્યુ છે. તે દિલ્હી કેપિટલ્સ (દિલ્હી ડેરડેવિલ) ફ્રેન્ચાઈઝી તરફથી રમશે.
હાલ ટીમ ઇન્ડિયાના સફળ ઓપનર્સમાંથી એક શિખર ધવને જણાવ્યુ કે કેવી રીતે તેની પત્ની આયશા પાસેથી અનેક વસ્તુઓ શીખી હતી. તેણે કહ્યુ કે ''અમે દરેક ભારતીય-પંજાબી કલ્ચરમાંથી આવીએ છીએ. જ્યાં દરેક વાત પર જી હા જી હા જ કરવાનું હોય છે. ક્યારેય ના નથી કહેવામાં આવતી. જોકે તેની (પત્ની આયશા) પાસેથી શીખ્યુ કેવી રીતે ના કહેવુ જોઇએ.'' ધવને હસતા હસતા કહ્યું હતું કે હવે હું અડધો મેલબર્ન (આયશા ઓસ્ટ્રેલિયામાં રહે છે) વાળો બની ગયો છું.
શિખર ધવને જણાવ્યું કે તે જ્યારે ઓસ્ટ્રેલિયામાં હોય છે ત્યારે ઘરની સફાઇ પોતે જ કરે છે. તે જમવાનુ બનાવે છે અને વાસણ સાફ કરે છે. તેણે કહ્યું કે તે નથી ઈચ્છતો કે આ બધા કામ માટે કોઈને ડોલર આપવા પડે. પોતાની પહેલી કાર વિશે જણાવ્યુ હતુ કે ''2004માં મેં પહેલી કાર ત્યારે ખરીદી હતી જ્યારે મને અંડર-19 વર્લ્ડ કપનો ‘મેન ઓફ ધ ટૂર્નામેન્ટ’ પસંદ કરાયો હતો. ટીપિકલ દિલ્હી બોયની જેમ મેં તેમાં વૂફર લગાવ્યા હતા.''