- ભાવનગરમાં પાણીનો પોકાર
- જીવંતતા ઝંખતી રાજાશાહી સમયની 20 હજારથી વધુ વાવ
- પૌરાણિક વાવોની સાફ-સફાઇ અને રિચાર્જ કરવા લોકમાંગ
હાલ ઉનાળાની સીઝનમાં ગરમીનો માહોલ બરોબરનો જામ્યો છે. આવી સ્થિતિ વચ્ચે એક બાજુ પાણીનો વપરાશ વધ્યો છે તો બીજી બાજુ પાણીના તળ ઊંડા ગયા હોવાથી અનેક વિસ્તારોમાં પાણીની પળોઝણ જન્મી છે. ચારે કોર પાણી આપો.. પાણી આપો...ની માંગ ઉઠી રહી છે. જળસમસ્યા વિકટ સ્થિતિનું સ્વરૂપ ધારણ કરે એવા સંજોગો વર્તાઇ રહ્યા છે. આવી સ્થિતિ વચ્ચે ભાવનગરમાં રાજાશાહી વખતે લાખ્ખો લોકોની તરસ છીપાવતી પૌરાણિક વાવોની સાફ-સફાઇ અને રિચાર્જ કરવા લોકોમાંથી માંગ ઉઠી છે.
પાણીની જરૂરીયાતને ધ્યાને લઈ રાજાશાહી સમયના વાવ, કૂવાને જીવિત કરવા જરૂરી
ભાવનગરના રાજવી મહારાજા તખ્તસિંહજી અને મહારાજા ભાવસિંહજી બીજાના સમયમાં જિલ્લામાં 20 હજારથી વધુ વાવનું નિર્માણ કરવામાં આવ્યું હતું. જે તે સમયે અહીં પાણીનો સંગ્રહ કરવામાં આવતો હતો અને રસ્તા પરથી પસાર થતા વટેમાર્ગુઓ વિરામ કરીને પાણીની તરસ છીપાવતા હતા. ત્યારે આકરા તાપમાં પાણી માટે વલખા મારતી જનતાની જરૂરિયાતને ધ્યાને લઈ સરકાર રાજાશાહી સમયના વાવ, કૂવાને ફરીથી જીવંત બનાવવાની દિશામાં કાર્યવાહી કરે તે જરૂરી બન્યું છે.
તો લોકોને ક્યારેય પાણી માટે વલખા મારવા નહી પડે
સરકાર પાણીના સ્ત્રોત અને સંગ્રહ માટે કરોડો રૂપિયાના ખર્ચ કરે છે જેથી આવા વાવ, કુવા અને તળાવોને પણ જીવંત કરવા જોઈએ. ભવનગરના રાજવી મહારાજા તખ્તસિંહજી અને મહારાજા ભાવસિંહજી બીજાના સમયમાં 20હજાર વાવ-કૂવાના નિર્માણને પગલે જે-તે સમયે આ વિસ્તારના પાણીના તળ હંમેશા ઊંચા રહેતા હતા. મહત્વનું છે કે, ભાવનગર જિલ્લમાં ગોહિલવાડ સમયે સૌથી વધુ વાવનું નિર્માણ કરવામાં આવ્યા હતું. જેમાંની મોટાભાગની વાવ પગથિયાં વાળી હતી. જેના કારણે લોકો અંદર જઈને પાણી પી શકતા હતા. જો રજવાડા સમયની આ વાવોને જીવંત કરવામાં આવે તો લોકોને ક્યારેય પાણી માટે વલખા મારવા નહી પડે તેવું જાણકારોમાં ચર્ચાઇ રહ્યું છે.
ભૂકંપ સહિતની કુદરતી આફતો અને સમયની થપાટ ખમી જર્જરિત બનેલી તથા અડીખમ અને ઉજળો વારસો ધરાવતી વાવોને જીવિત કરવા અંગે ઇતિહાસવિદો અને લોકોની માંગ છે. આવી વાવને ફરી પુનઃ જીવિત કરીને સાફ સફાઈ કરાવી તેમાં શુદ્ધ પાણીનો સંગ્રહ થઈ તે દિશામાં કામ કરવા માંગનો સૂર ઉઠ્યો છે.
