ઉત્તર ભારતમાં ભારે હિમવર્ષા જોવા મળી છે. જેમાં જમ્મૂ-કાશ્મીર અને હિમાચલ પ્રદેશમાં ભારે હિમવર્ષાના કારણે લોકોની મુશ્કેલીમાં વધારો જોવા મળ્યો છે. ભારે હિમવર્ષાના પગલે વાતાવરણમાં ઠંડકતા પ્રસરતાં તાપમાનનો પારો ગગડતો જોવા મળ્યો છે. હિમવર્ષાના કારણે રાજૌરીમાં જનજીવન પ્રભાવિત જોવા મળ્યું છે.
જમ્મૂ કશ્મીરમાં ભારે હિમવર્ષા થઇ
હિમવર્ષાથી હવાઇ સેવા અને વાહનવ્યવહાર પર અસર
હિમાચલમાં વરસાદ અને હિમવર્ષાના કારણે ઠંડીનું પ્રમાણ વધી ગયું
જમ્મૂ કશ્મીરમાં ભારે હિમવર્ષા થઇ રહી છે. હિમવર્ષાના કારણે રાજૌરીમાં જન જીવન પ્રભાવિત થઇ ગયું છે. શિમલામાં હિમવર્ષાથી લોકોની મુશ્કેલીમાં વધારો થયો છે. મુસાફરો અને વેપારીઓની પણ હાલત કફોડી બની છે. હિમવર્ષાના કારણે હવાઇ સેવા અને વાહનવ્યવહાર પર અસર થઇ છે. બીજી તરફ સતત હિમવર્ષાને કારણે વીજ પુરવઠો પણ ઠપ થઇ ગયો છે.
હિમાચલ પ્રદેશમાં ફરી એકવાર મોસમ બેઈમાન થઈ ગયું છે. હિમાચલમાં ફરીથી હિમવર્ષાની શરૂઆત થઈ ગઈ છે. મધરાતથી જ નીચાણવાળા વિસ્તારોમાં વરસાદ અને પહાડો પર હિમવર્ષા થઈ રહી છે. વરસાદ અને હિમવર્ષાના કારણે ઠંડીનું પ્રમાણ વધી ગયું છે. કાંગડાના ધૌલાધાર પર્વતમાળામાં ભારે હિમવર્ષા ચાલુ છે. ગલૂ અને ધર્મકોટ સુધી બરફ પહોંચી ગયો છે. કુલ્લુના મનાલીમાં પણ હિમવર્ષા થઈ છે. હિમવર્ષાના કારણે રાજ્યમાં અનેક માર્ગો બંધ થઈ ગયા છે.
શિમલામાં પણ હિમવર્ષા યથાવત્ છે, તાપમાનની વાત કરીએ તો કેલોંગમાં પારો માઈનસ 8 ડિગ્રી, કલ્પામાં માઈનસ 6 ડિગ્રી, મનાલીમાં માઈનસ 2 ડિગ્રી અને શિમલામાં માઈનસ 1 ડિગ્રી તાપમાન નોંધાયું છે. પર્યટન નગરી મનાલી સહિત આસપાસના વિસ્તારોમાં હિમવર્ષા થઈ રહી છે. સોલંગનાળામાં પણ હિમવર્ષા થતાં વાહનોને નેહરુકુંડમાં જ રોકી દેવામાં આવ્યા છે. નેહરુકુંડ અને બાહંગ પર્યટકો માટે સ્નો પોઈન્ટ બની ગયું છે.
માલ રોડ પર પણ સહેલાણીઓ મસ્તી કરતા નજરે પડ્યા હતા. શિમલા, કિન્નૌર, સિરમૌર જેવા ઉંચાણવાળા વિસ્તારોમાં હિમવર્ષા થઈ રહી છે. જેના કારણે જનજીવન પર અસર થઈ રહી છે. હવામાન વિભાગે 6 જિલ્લામાં આજે અને આવતીકાલે હિમવર્ષાની આગાહી કરી છે. કાંગડા, ચંબા, શિમલા, સિરમૌર, સોલન અને કિન્નૌરમાં હવામાનમાં પલટો આવશે.
આ તરફ મનાલી કેલોંગ માર્ગ પર મુલિંગ પુલ પાસે હિમસ્ખલન થયું છે. જેના કારણે માર્ગ બંધ થઈ ગયો છે. જ્યારે ચંદ્રા વેલીના લોકો પગપાળા ચાલતા કેલોંગ પહોંચી રહ્યા છે. લાહૌલ ખીણના લોકો ઘરમાંથી બહાર નીકળી રહ્યા છે. જોકે હિમસ્ખલનના કારણે ભયનો માહોલ ફેલાઈ ગયો છે.