હાહાકાર / માંડ કોરોના ઘટ્યો ત્યાં રોગચાળાએ રાજકોટને લીધુ ભરડામાં, દોઢ મહિના 2163 કેસ નોંધાતા ખળભળાટ

• રાજકોટમાં રોગચાળાનો કહેર
• દર્દીઓથી ઉભરાઇ રહી છે હોસ્પિટલ
• છેલ્લા દોઢ મહિનામાં કુલ 2163 કેસ નોંધાયા

મળતી વિગતો પ્રમાણે, રાજકોટ શહેરમાં રોગચાળાએ કહેર વર્તાવ્યો છે. ચોમાસાની ઋતુ ચાલુ થતા જ  શહેરમાં ડેન્ગ્યુ, મેલેરિયા, ચિકનગુનિયા, ટાઈફોઈડ, કોલેરા, ઝાડા-ઉલ્ટી અને વાયરલ તાવના કેસમાં વધારો થયો છે. જુલાઇ અને ઓગસ્ટ મહિનામાં ડેંગ્યુ, મેલેરિયા અને ચિકનગુનિયાના દોઢ ડઝન કેસ નોંધાયા છે.

1 જુલાઈથી 16 ઓગસ્ટ સુધીમાં કુલ 2163 કેસ

રાજકોટ મનપાના આરોગ્ય અધિકારીએ જણાવ્યું હતું કે, 1 જુલાઈથી 16 ઓગસ્ટ સુધીમાં કુલ 2163 કેસ નોંધાયા છે. જેમાં શરદી ઉધરસ ના 1 હજાર 656 કેસ, ઝાડા ઉલ્ટીના 445 કેસ, મરડાના 15 કેસ અને કમળાના 8 કેસ નોંધાયા છે. જ્યારે મેલેરિયા, ડેન્ગ્યુ અને ચિકનગુનિયાના 10 કેસ નોંધાયા છે. શહેરના ખાનગી દવાખાનાઓમાં પણ વાયરલ રોગચાળાના દર્દીઓની ભીડ વધી રહી છે.

 મનપા દ્વારા કરાયું ફોંગિંગ

ત્યારે રાજકોટ મનપા દ્વારા મચ્છરોના ઉપદ્રવને લઇ ફોગિંગની કામગીરી કરવામાં આવી રહી છે. સાથે જ મચ્છરજન્ય રોગચાળો અટકાવવા શહેરના અલગ અલગ વિસ્તારોમાં બાંધકામ સાઈટ, ઈન્ડસ્ટ્રીઝ સહિત વિવિધ પ્રિમાઈસીસમાં ચેકિંગ કરવામાં આવી રહ્યું છે.

મચ્છરોનો ઉપદ્રવ ઘટાડવાના કરાયા પ્રયાસો 

આરોગ્ય વિભાગની અલગ અલગ ટીમો બનાવી જે જગ્યાએ પાણી ભરાયું હોય ત્યાં મચ્છર નાશક દવાઓ નાખી મચ્છરોનો ઉપદ્રવ ઘટાડવામાં આવી રહ્યો છે. તેમજ મનપા દ્વારા સ્થાનિક લોકોને તેમના ઘરમાં કે બહાર વરસાદી પાણી ભરેલું હોય તો તેનો તાત્કાલિક નિકાલ કરવા પણ અપીલ કરવામાં આવી છે.