ભાદરવા પર મદાર / ગુજરાત પર મંડરાતા જળસંકટના વાદળ, કુલ ડેમમાંથી 60% જેટલા ડેમ હજુ પણ કોરાધાકોર

• રાજકોટ સહિત સૌરાષ્ટ્ર પર તોળાતું જળસંકટ 
• રાજકોટના 25 ડેમમાં માત્ર 32 ટકા પાણીનો જથ્થો 
• અમરેલી 65 ટકા અને સૌથી ઓછો પોરબંદરમાં 19 ટકા પાણીનો જથ્થો 
• સૌરાષ્ટ્રનો સૌથી મોટો ભાદર ડેમ હજુ 50 ટકા જ ભરાયો

ચોમાસાની સિઝનનાં હવે બે મહિના બાકી છે. ત્યારે સૌરાષ્ટ્રનાં જળાશયોની સ્થિતિ ચિંતાનજનક જોવા મળી રહી છે. સૌરાષ્ટ્રનાં કુલ 141 મોટા જળાશયોની હાલની સ્થિતિએ 60 ટકા જેટલા ખાલી છે. જેમાં દેવભૂમિ દ્વારકા, પોરબંદર પંથકની સ્થિતિ સૌથી વધુ સંકટ છે. કેટલાક ડેમોનાં હજુ તળીયા સુધી પણ આવ્યું નથી. સૌરાષ્ટ્રનાં અનેક જળાશયોમાં આખુ વર્ષ ચાલે તેટલો પાણીનો જથ્થો આવ્યો નથી તે મોટો ચિંતાનો વિષય છે. જો આગામી બે મહિનામાં સારો વરસાદ ન થાય તો સૌરાષ્ટ્રમાં જળસંકટ તોળાય તેવી શક્યતા છે.  

સૌરાષ્ટ્રમાં અમરેલી સિવાય તમામ જિલ્લા પર તોળાતું જળસંકટ
રાજકોટ જિલ્લાનાં 25 ડેમોમાં 32 ટકા જેટલું જ પાણી છે. બીજી તરફ સૌરાષ્ટ્રનાં બીજા નંબરનો સૌથી મોટો ડેમ ભાદર હજુ 50 ટકા જ ભરાયો છે. જ્યારે આજી-1માં પણ 50 ટકા જ પાણીનો જથ્થો આવ્યો છે. રાજકોટને પાણી પૂરુ પાડતા ડેમોમાં નર્મદાનું પાણી ઠાલવવામાં આવી રહ્યું છે. પરંતુ અન્ય ડેમોમાં જયાં નર્મદાની લાઈન નથી તેવા ગામોમાં આગામી દિવસોમાં જળસંકટ ઘેરું બનશે તેવુ જણાય રહ્યું છે. જયારે  અમરેલી 65 ટકા અને સૌથી ઓછો પોરબંદરમાં 19 ટકા પાણીનો જથ્થો છે.

કયા ડેમમાં કેટલું પાણી?

ભાદરવા પર ખેડૂતોને મદાર
સૌરાષ્ટ્રમાં દ્વારકા, પોરબંદર તેમજ સુરેન્દ્રનગર જિલ્લાને બાદ કરતાં લગભગ તમામ જિલ્લામાં થોડી ઘણી પણ પાણીની સ્થિતિ સારી જોવા મળી રહી છે. હવામાન વિભાગની આગાહી મુજબ 7 સપ્ટેમ્બર એટલે કે આજ થી ખાડીમાં વધુ એક સિસ્ટમ સક્રિય થઈ રહી ત્યારે ગુજરાતવાસીઓને આશા છે કે ભાદરવો વરસાદથી ભરપૂર રહેશે. સપ્ટેમ્બરની શરૂઆતમાં પડેલા થોડા ઘણા વરસાદથી ખેડૂતોના બળતા પાકને નવજીવન તો મળ્યું છે પણ હજુ તો પીવાના પાણી અને સંચાઈ માટે ડેમ કે તળાવ પર આધારિત રહેવું પડે તેમ છે પણ ગુજરાતમાં ડેમની સ્થિતિ વરસાદ ઓછો થતાં તળિયા ઝાટક જેવી જ છે આથી આગામી સમયમાં જો વરસાદ રિસામણાં કરે તો પરિસ્થિતિ વધુ વિકટ બને તેમ છે. હાલ તો ખેડૂતો સહિત તમામ લોકો કાગડોળે વરસાદ સામે મીટ માંડી બેઠા છે.