ગઇકાલે મોડી રાત્રે 'દૂધ નહીં મળે' એવી અફવા ફેલાવાના કારણે અનેક શહેરોમાં પાર્લર પર દૂધ લેવા પડાપડી થઇ હતી. ત્યારે આ મામલે આજે VTV એ રિયાલિટી ચેક કર્યું છે.
Share
VTV NEWSએ કર્યું રિયાલિટી ચેક
દૂધનો જથ્થો પૂરતા પ્રમાણમાં ઉપલબ્ધ
મોડી રાત્રે પાર્લર પર થઈ હતી પડાપડી
માલધારી સમાજ દ્વારા પોતાની વિવિધ માંગોને લઇને ગુજરાત સરકાર વિરૂદ્ધ લડત આપી રહી છે. ત્યારે પોતાની માંગને પ્રબળ કરવા તેમજ સરકાર સુધી અવાજ પહોંચાડવા આજે રાજ્યના અનેક પ્રાંતોમાં માલધારી સમાજ દ્વારા દૂધ વિતરણ બંધ રાખી વિરોધ કરવાનું નક્કી કરાયું છે. જેને લઇને ગઇકાલે મોડી રાત્રે અમદાવાદ, રાજકોટ સહિતના શહેરોમાં દૂધની ડેરીઓ બહાર દૂધ લેવા લોકોએ પડાપડી કરી હતી. ત્યારે હવે આ મામલે VTV NEWS એ રિયાલિટી ચેક કર્યું છે.
અમદાવાદમાં અમૂલ પાર્લર ઉપર રાબેતા મુજબ દૂધ ઉપલબ્ધ
દૂધ નહીં મળેની અફવાના કારણે ગઇકાલે મોડી રાત્રે અમૂલ પાર્લર પર દૂધ લેવા માટે લાંબી કતારો લાગી હતી. ત્યારે આ મુદ્દાને લઇ VTV NEWSએ રિયાલિટી ચેક કરતા સામે આવ્યું છે કે, અમદાવાદમાં અમૂલ પાર્લર ઉપર રાબેતા મુજબ દૂધ મળી રહ્યું છે. દૂધ નહીં મળે તેવી અફવાથી દૂર રહો. મહત્વનું છે કે, માલધારીઓ દૂધ નહીં ભરે તેવી અફવા ફેલાઈ હતી. આથી મોડી રાત્રે દૂધ પાર્લર ઉપર દૂધ લેવા પડાપડી થઈ હતી.
સુરતમાં ગઇકાલે સુમુલ ડેરીના ટેમ્પોમાં અસામાજિક તત્વોએ કરી હતી તોડફોડ
ઉલ્લેખનીય છે કે, ગઇકાલે સોશિયલ મીડિયામાં માલધારી સમાજના મેસેજ વાયરલ થતા દૂધ માટે પડાપડી શરૂ થઇ ગઇ હતી. ઉપરાંત સુરત, રાજકોટ, સુરેન્દ્રનગર, વડોદરા સહીતના અનેક સ્થળોએ આ સ્થિતિ જોવા મળી હતી. બીજી બાજુ રાજ્યના અમુક શહેરોમાં દૂધ ન મળવાની આશંકાએ દૂધ લેવા માટે પડાપડીની ઘટના ઘટી છે. ત્યારે સુરતમાં ગઇકાલે સુમુલ ડેરીના ટેમ્પોમાં તોડફોડ કરવામાં આવી હતી. અસામાજિક તત્વોએ સુરત જિલ્લામાં 3થી વધુ દૂધના ટેમ્પોમાં તોડફોડ કરી છે. આ સાથે ટેમ્પોમાં રહેલું દૂધ પણ રસ્તામાં ઢોળી દીધું હતું. જેથી સુમુલ ડેરીએ મોડી રાત્રે પોલીસ બંદોબસ્ત સાથે દૂધનું વિતરણ કર્યું હતું.
બંને ડેરીઓ પાસે પૂરતા પ્રમાણમાં દૂધનો જથ્થો: સુમુલ અને ચોર્યાસી ડેરી
સુરતમાં દૂધ વિતરણ બંધ રહેવાની અફવાએ જોર પકડતા ડેરીઓ પરની ગઇકાલે મોડી રાત્રે જામેલી ભારે ભીડના પગલે સુમુલ અને ચોર્યાસી ડેરી દ્વારા મહત્વની જાહેરાત કરાઇ છે.
શહેરીજનોને દૂધની અછત બાબતે ચિંતા ન કરવા અપીલ
સુમુલ અને ચોર્યાસી ડેરીના તમામ કાઉન્ટરો પર દૂધ મળશે. દરેક સેન્ટરો પરથી પર્યાપ્ત માત્રામાં દૂધ મળી રહેશે. બંને ડેરીઓ પાસે પૂરતા પ્રમાણમાં દૂધનો જથ્થો છે. માત્ર માલધારીઓ દ્વારા છૂટક દૂધ વેચાણ બંધ રહેશે. શહેરીજનોને દૂધની અછત બાબતે ચિંતા ન કરવા અપીલ.
