સુરતની બસનો અકસ્માત પહેલાનો વીડિયો સામે આવ્યો છે. જેમાં મહિલાઓ ડાન્સ કરતી અને હર્ષની ચિચિયારીઓ પાડતી દેખાય છે. પરંતુ આ હસતા ચહેરાઓ અચાનક આક્રંદમાં ફેરવાઇ જાય છે.
સુરતથી આવેલી બસનો અકસ્માત પહેલાનો વીડિયો સામે આવ્યો
અકસ્માત પહેલા મહિલાઓ બસમાં ડાન્સ-મસ્તી કરતી જોવા મળી
અકસ્માતમાં 2 મહિલાના મોત થયા છે, જ્યારે 50ને બચાવી લેવાયા છે
સુરતના શ્યામ ગરબા ક્લાસિસની બસને ટૂર પરથી પરત ફરતી વેળાએ અકસ્માત નડ્યો છે. બસ સાપુતારા માલેગાંવ ખીણમાં ખાબકી હતી. આ અકસ્માતમાં 2 મહિલાના મોત નિપજ્યા છે, જ્યારે અન્ય મહિલાઓ ઈજાગ્રસ્ત થઇ છે. જેથી ઇજાગ્રસ્ત મહિલાઓને સારવાર અર્થે સુરતની સિવિલ હોસ્પિટલ ખાતે ખસેડવામાં આવી છે. હાલમાં આ અકસ્માત પહેલાનો વીડિયો સામે આવ્યો છે. વીડિયોમાં અકસ્માત પહેલા મહિલાઓ બસમાં ડાન્સ ને મસ્તી કરતી જોવા મળી રહી હતી. ઉપરાંત અકસ્માત પહેલા પતિ-પત્ની વચ્ચેની વાતચીતનું રેકોર્ડિંગ પણ સામે આવ્યું છે.
તમને જણાવી દઇએ કે, ડાંગ જિલ્લાના સાપુતારા નજીક માલેગાવ ઘાટ રોડ પર અવારનવાર અકસ્માતની ઘટનાઓ સામે આવે છે. ત્યારે શનિવારે મોડી સાંજે સાપુતારા નજીક સુરતની ખાનગી બસ ખીણમાં ખાબકી હતી. આ બસમાં 50થી વધુ મહિલાઓ સવાર હતી. આ બસ દુર્ઘટનામાં 2 મહિલાઓના મોત થયા છે. તો 5 જેટલી મહિલાઓને નાની-મોટી ઇજાઓ થઇ હતી. ઈજાગ્રસ્ત મહિલાઓને નજીકની હોસ્પિટલે સારવાર માટે લઇ જવાઈ હતી. જ્યારે 50 મહિલાઓને બચાવી લેવાઇ છે અને તે સહી સલામત હોવાના સમાચાર મળી રહ્યાં છે. આ દુર્ઘટનાના પગલે સ્થાનિકો અને આસપાસના લોકો મદદે આવી પહોંચ્યા હતા. તો એમ્બ્યુલન્સ અને પોલીસ સહિતની ટીમો પણ ઘટનાસ્થળે પહોંચી હતી. રેસ્ક્યુ કરાયેલી તમામ મહિલાઓને સુરક્ષિત સ્થળે ખસેડી લેવાઇ છે.
ANI ન્યૂઝ એજન્સીના અનુસાર, ગૃહ રાજ્યમંત્રી હર્ષ સંઘવીએ જણાવ્યું છે કે, ગુજરાતના ડાંગના સાપુતારા પાસે બસ દુર્ઘટનામાં બે મહિલા મુસાફરોના મોત થયા છે, જ્યારે 50 મુસાફરોને બચાવી લેવામાં આવ્યા છે. હર્ષ સંઘવીએ જણાવ્યું કે, ડાંગ જિલ્લાના સાપુતારા પાસે 50થી વધુ મુસાફરોને લઈ જતી બસ ખીણમાં પડી હતી. પોલીસ ઘટનાસ્થળે પહોંચી હતી, રેસ્ક્યુ ઓપરેશન ચાલુ છે. ટાયર બ્લાસ્ટને કારણે થયેલા અકસ્માતમાં અનેક ઇજાગ્રસ્ત થયા છે.
ગરબા ક્લાસિસમાંથી સાપુતારા પ્રવાસે ગઇ હતી મહિલાઓ
સુરતના રાંદેર અડાજણ વિસ્તારમાં આવેલા ગરબા ક્લાસીસના સભ્યો 5 બસ લઇને સાપુતારાના પ્રવાસે ગયા હતા ત્યારે આ અકસ્માત થયો હતો. બાકીના સુરક્ષિત લોકોને અન્ય બસ મારફતે સુરત લાવવાની કામગીરી હાથ ધરવામાં આવી છે. તો હાલ ડાંગમાં વરસાદના પગલે રેસ્ક્યુ કામગીરીમાં મુશ્કેલી પડી હતી. તો ખીણ વિસ્તાર હોવાથી વીજપુરવઠો ન હતો જેને લઇને પણ રેસ્ક્યુ કામગીરીમાં મુશ્કેલીનો સામનો કરવો પડ્યો હતો. તો મંત્રી પૂર્ણેશ મોદીએ પણ કાર્યકર્તાઓ-કલેક્ટર સાથે આ ઘટનાને લઇને વાત કરી હતી. પૂર્ણેશ મોદીએ વોટ્સએપ ગ્રુપમાં કાર્યકર્તાઓને બચાવ અને રાહત કામગીરી માટે અપીલ કરી હતી.