મુખ્યમંત્રી વિજય રૂપાણી આજે દિલ્લીના પ્રવાસે જશે. ત્યા તેઓ પ્રધાનમંત્રી નરેન્દ્ર મોદી સાથે બેઠક કરશે અને વાયબ્રન્ટ ગુજરાતની તૈયારીઓને લઇને સમિક્ષા કરશે તથા વાયબ્રન્ટ સમિટ માટે પ્રધાનમંત્રી મોદીનું માર્ગદર્શન મેળવશે.
આ ઉપરાંત મુખ્યમંત્રી કેન્દ્ર સરકારના વિવિધ મંત્રાલયોના સહયોગ અંગે પરામર્શ કરશે. મુખ્યમંત્રીના દિલ્લી પ્રવાસમાં તેમની સાથે મુખ્ય સચિવ મુખ્ય અગ્ર સચિવ અને અગ્ર સચિવ પણ જોડાશે.
ઉલ્લેખનીય છે કે વાયબ્રન્ટ ગુજરાત-2019ને લઇને સરકાર અત્યારથી જ તૈયારીઓ કરી રહી છે. ગત 26મીએ મુખ્યપ્રધાન વિજય રૂપાણીએ મુંબઇ ખાતે એક રોડ શો યોજ્યો હતો. ત્યારબાદ સીએમ રૂપાણીએ 15થી વધારે બિઝનેસ લીડર્સ અને ઉદ્યોગકારો સાથે મુલાકાત કરી હતી.
જ્યારે 20 જેટલા અન્ય દેશોના કોન્સ્યુલેટ જનરલ સાથે રાત્રી ભોજનનું આયોજન પણ કરવામાં આવ્યું હતું. આમ મુખ્યમંત્રી વિજય રૂપાણી દ્વારા આગામી ગાંધીનગર ખાતે 18થી 20 જાન્યુઆરી દ્વારા યોજાનારી વાઇબ્રન્ટ સમિટને લઇ તૈયારીઓ શરૂ કરી દેવામાં આવી છે.
વાઇબ્રન્ટ ગુજરાતનું એક પ્રતિનિધિ મંડળ અમેરિકાની મુલાકાતે પણ જઇ આવ્યું હતું. આમ જ્યારે વાઇબ્રન્ટ ગુજરાત-2019ની તારીખ નજીક આવી રહી છે ત્યારે મુખ્યપ્રધાન વિજય રૂપાણી આજે દિલ્હી ખાતે વડાપ્રધાન નરેન્દ્ર મોદી સાથે મુલાકાત કરી તૈયારીઓને લઇને સમીક્ષા કરશે.