ખેડૂત તરફી નિવેદન / MSP પર કાયદો, 'શહીદ' ખેડૂતને 1 કરોડનું વળતર, PM મોદીને લખેલા પત્રમાં ભાજપ નેતાની મોટી માગ

• ભાજપ સાંસદ વરુણ ગાંધીનું નિવેદન
• હવે MSP પર પણ કાયદો બનાવો
• આંદોલનમાં શહીદ થયેલા દરેક ખેડૂતને 1-1 કરોડનું વળતર આપો 

ખેડૂતોના હમસફર બનેલા ભાજપના દિગ્ગજ નેતા અને સાંસદ વરુણ ગાંધીએ ફરી વાર પ્રધાનમંત્રી મોદીને પત્ર લખીને એમએસપી પર કાયદો બનાવવાની માગ કરી છે. વરુણ ગાંધીએ પ્રધાનમંત્રી મોદીને લખેલા પત્રમાં જણાવ્યું કે મારી નમ્ર વિનંતી છે કે હવે MSP પર પણ કાયદો બનાવવો જોઈએ તથા બીજા મુદ્દા પણ તત્કાળ નિર્ણય થવો જોઈએ, જેનાથી ખેડૂત ભાઈ આંદોલન ખતમ કરીને સન્માન સાથે પોતપોતાના ઘેર જઈ શકે. પત્રમાં વરુણ ગાંધીએ એવું પણ લખ્યું કે લખીમપુર ખીરી ઘટના લોકશાહી પર કલંક સમાન છે. આ કેસના આરોપી સામે કડક કાર્યવાહી થવી જોઈએ સાથે સરકારે રાષ્ટ્રહિતમાં ન્યૂનતમ સમર્થન મૂલ્યની કાનૂની ગેરન્ટી આપવાની ખેડૂતોની માગ પણ સ્વીકારવી જોઈએ. આ આંદોલનમાં 700 ખેડૂતો શહીદ થયા છે તેમના પરિવારજનોને એક-એક કરોડનું વળતર આપવું જોઈએ. 

1 કરોડ વળતર ચૂકવવામાં આવે
વરુણે લખ્યું કે આંદોલન દરમિયાન 700થી વધુ ખેડૂતો 'શહીદ' થયા છે અને આ નિર્ણય અગાઉથી લેવો જોઈતો હતો. તેમણે લખ્યું હતું કે, 'હું તમને વિનંતી કરું છું કે આંદોલન દરમિયાન શહીદ થયેલા અમારા ખેડૂત ભાઈઓ અને બહેનોના પરિવારો પ્રત્યે સંવેદના વ્યક્ત કરતી વખતે દરેકને એક-એક કરોડ રૂપિયાનું વળતર જાહેર કરો.' તેમણે ખેડૂતો સામે નોંધાયેલી 'ખોટી' એફઆઈઆર ને નકારી કાઢવાની પણ માંગ કરી હતી.

લખીમપુર ખીરી કાંડના આરોપી સામે કાર્યવાહી થવી જોઈએ-વરુણ ગાંધી 
લખીમપુર ખીરી કેસનો ઉલ્લેખ કરતાં ભાજપના સાંસદે પીએમ મોદીને લખેલા પત્રમાં આશિષ મિશ્રાના પિતા અને કેન્દ્રીય રાજ્ય મંત્રી અજય મિશ્રા સામે કડક કાર્યવાહી કરવાની માંગ કરી છે.  કેન્દ્રીય પ્રધાનના પુત્રની કારે ઓક્ટોબરમાં લખીમપુર ખેરીમાં વિરોધ કરી રહેલા ખેડૂતોને કારથી કચડી નાખ્યાં હતા જેના પગલે આ વિસ્તારમાં હિંસા ફાટી નીકળી હતી. આ હિંસામાં 8 લોકો માર્યા ગયા હતા. જેમાં ચાર ખેડૂતો, એક પત્રકાર, ભાજપના બે કાર્યકરો અને એક ડ્રાઇવરના નામ સામેલ છે.