વલસાડ / ગુજરાતની આશ્ચર્યજનક ઘટનાઃ પિતાના હાથમાં રહેલી મૃત બાળકીએ સ્મશાનમાં ખોલી આંખો, તાત્કાલિક ખસેડાઈ હોસ્પિટલ

• વલસાડના ધરમપુરમાં આશ્ચર્યજનક ઘટના આવી સામે
• તબિબોએ મૃત ઘોષિત કરેલી બાળકી જીવત બની
• સ્મશાનમાં બાળકીને લઈ ગયા બાદ બાળકીએ ખોલી આંખો

પાનવા ગામની એક મહિલાએ સાતના મહિને જ બાળકીને જન્મ આપતા વજન ઓછું હતું. જેને લઇને બાળકીને અઠવાડિયા માટે કાચની પેટીમાં રાખવામાં આવી હતી. ત્યારબાદ ડોક્ટરે બાળકીને મૃત જાહેર કરી હતી. જોકે પરિવારજનો સ્મશાનમાં ખાડો ખોદી અંતિમવિધિ શરૂ કરી. આ સમયે જ પિતાના હાથમાં રહેલી બાળકીએ હલન ચલન સાથે આંખો ખોલી. આ ઘટના બનતા જ સૌ આશ્ચર્યમા મૂકાઈ ગયા હતા. રામ રાખે તેને કોણ ચાખે કેહવત ધરમપુરમાં સાર્થક બની છે.

શું બની સમગ્ર ઘટના ?
પાનવા ગામની ગર્ભવતી મહિલાને ધરમપુરની પ્રસુતિ હોસ્પિટલ દાખલ કરાઈ હતી. અહીં પ્રિમેચ્ચોર ડિલિવરી થતાં સાતમાં મહિને જ બાળકીને જન્મ આપ્યો હતો. જોકે બાળકીનું વજન ઓછું હોવાથી તેને કાચની પેટીમાં રાખવી પડી હતી. 6 દિવસની સારવાર બાદ ડોક્ટરે બાળકીને મૃત જાહેર કરી હતી. ત્યાર બાદ બાળકીના મૃતદેહને પરિવારને સોંપવામાં આવ્યો હતો.

સ્મશાનમાં બાળકીએ આંખો ખોલતા તાત્કાલિક હોસ્પિટલ ખસેડાઈ
6 દિવસની સારવાર બાદ પણ બાળકીનો જીવ ન બચતાં પરિવારમાં શોકનું મોજું ફરી વળ્યું હતું. બાળકીના મૃત્યુ અંગે જાણ થતાં સગા-સંબંધીઓ પણ પહોંચી ગયા હતા. બાદમાં બાળકીને સ્મશાન લઈ જઈ ખાડો ખોદીને અંતિમવિધિ કરવાની તૈયારી ચાલી રહી હતી. ત્યાં અચાનક જ પિતાએ પકડેલી બાળકીના શરીરમાં હલન ચલન થતાં સૌ ચોંકી ગયા હતા. બાળકીએ હાથ-પગ મરોડીને આંખ ખોલતા જ હાજર લોકો આખી ઘટનાને કૂતુહલવશ જોતા રહી ગયા હતા. જોકે આ ઘટના તબિબોની બેદરકારી પણ હોવાની શંકા છે.

હાલ બાળકીની હાલત સ્વસ્થ હોવાનો તબિબોનો દાવો
બાળકીએ આંખો ખોલી દેતા તાત્કાલિક 108ને ફોન કરીને બાળકીને સારવાર માટે ધરમપુરની રામચંદ્ર હોસ્પિટલમાં ખસેડવામાં આવી હતી. જ્યાં એક દિવસની સારવાર બાદ બાળકીને અન્ય હોસ્પિટલ લઈ જવાઈ હતી, જ્યાં એનઆઈસીયુંમાં રાખ્યા બાદ હાલ બાળકીની હાલત સ્વસ્થ હોવાનો ડોક્ટરોએ દાવો કર્યો છે.