વડોદરામાં તબીબે બાળકને અડફેટે લેતા બાળકનું મોત નિપજ્યું છે. ત્યારે આ સમગ્ર ઘટનાના CCTV સામે આવ્યા છે. વડોદરામાં આયુર્વેદિક ચાર રસ્તા પાસે તબીબે રસ્તા પાસે રમતા બાળક પર કાર ચઢાવી દીધી હતી.
વડોદરામાં તબીબે બાળકને અડફેટે લેતા મોત
ઘટનાના CCTV ફૂટેજ આવ્યા સામે
આયુર્વેદિક ત્રણ રસ્તા પાસે બની હતી ઘટના
જેમાં સારવાર દરમિયાન 3 વર્ષના માસૂમ બાળકનું મોત નિપજ્યું. તબિબ પાણીગેટ સ્થિત શ્રીજી હોસ્પિટલ ચલાવે છે. હાલ પોલીસે તબીબ મિતેષ સુતરિયાની ધરપકડ કરી અને વધુ કાર્યવાહી હાથ ધરી છે.
બાળકના માથાના ભાગે પહોંચી ગંભીર ઇજાઓ
ફૂટપાથ પર રહીને મજૂરી કરતા મૂળ એમપીના ઇંટાવાનો સાલિયા વસનિયાનો પરિવારનો પુત્ર રમી રહ્યો હતો ત્યારે અચાનક ધસી આવેલી કાર તેના પર ફરી વળી હતી.
જો કે, આ ઘટનાને પગલે તેના માથાના અને શરીરના ભાગો પર ગંભીર ઇજાઓ પહોંચી હતી, આ પ્રકારની ઇજાઓ પહોંચતા તેને સારવાર અર્થે નજીકના દવાખાને ખસેડવામાં આવ્યું હતું. જો કે, તેનું સારવાર દરમિયાન મોત નિપજ્યું હતું.
કાર ચાલક તબીબ સ્થળ પરથી ફરાર થઇ ગયો હતો
નોંધનીય છે કે, આ ઘટના બાદ લોકોનું ટોળું ઘટના સ્થળે ભેગું થઇ ગયું હતુ. જોકે કાર ચાલક તબીબ સ્થળ પરથી ફરાર થઇ ગયો હતો. પણ લોકોએ તબીબની કાર ઓળખી લીધી હતી. આ અંગે પાણીગેટ પોલીસને જાણ કરવામાં આવતા પોલીસે તપાસ હાથ ધરી હતી અને મોડી તેની ધરપકડ કરવામાં આવી હતી.