ઠાગાઠૈયા / વડોદરા મનપાની ભરતી ડખ્ખે ચડી: 6 મહિના અગાઉ કાયમીની જાહેરાત બાદ કરાર આધારિત ભરતી કરાતા વિવાદ

• વડોદરા મનપાએ બહાર પાડેલી ભરતી કરાર આધારિત કરાતા ટલ્લે ચડી
• 6 મહિના અગાઉ વડોદરા મનપાએ 641 પદ માટે ભરતી બહાર પાડી હતી
• પાલિકાએ 11 માસના કરાર આધારિત ભરતી કરવાની પ્રક્રિયા શરૂ કરી

વડોદરા કોર્પોરેશન દ્વારા ફેબ્રુઆરી 2022 માં 641 પદ માટે ભરતીની જાહેરાત બહાર પાડવામાં આવી હતી. જેમાં 1 લાખ 71 હજાર 360 ઉમેદવારોએ ફોર્મ ભર્યા હતાં. ફોર્મ ફીના કારણે પાલિકાને 4 કરોડથી વધુની આવક પણ થઈ છે. ત્યારે કોર્પોરેશને ભરતીની જાહેરાત બહાર પાડ્યાને 6 મહિનાનો સમય વિતી ગયો હોવા છતાં આજદિન સુધી ઉમેદવારોને તૈયારી કરવા માટે પરીક્ષાનો કોર્ષ પણ નથી અપાયો કે પરીક્ષાની તારીખો પણ જાહેર નથી કરાઇ.

ઓગસ્ટ 2022 સુધી પાલિકાએ પરીક્ષા લેવાનું આયોજન કર્યું હતું પરંતુ હજુ સુધી પરીક્ષા નથી લેવાઇ. ત્યારે હવે ખાલી પદો ભરવા માટે પાલિકાએ 11 માસના કરાર આધારિત ભરતી કરવાની પ્રક્રિયા શરૂ કરી છે. જેને લઈને કાયમી ભરતી કરાશે કે કેમ તેને લઈ અનેક સવાલો ઉઠી રહ્યાં છે.

જુઓ કોર્પોરેશને કઈ પોસ્ટ પર કેટલી ભરતીની કરી હતી જાહેરાત?

• વોર્ડ ઓફિસર - 4 પોસ્ટ
• રેવન્યુ ઓફિસર - 7 પોસ્ટ
• જુનિયર ક્લાર્ક - 552 પોસ્ટ
• સબ સેનેટરી ઇન્સ્પેકટર - 110 
• મલ્ટી પર્પઝ હેલ્થ વર્કર - 68

કુલ: 641 જગ્યા

વડોદરા પાલિકામાં વર્ગ 1, 2 અને 3માં હાલમાં 52 ટકા જગ્યા ખાલી છે. જેના કારણે કોર્પોરેશન તંત્ર હાલમાં ચાર્જથી ચાલતું કોર્પોરેશન બન્યું છે. કોર્પોરેશનમાં ચીફ ફાયર ઓફિસર, ડેપ્યુટી ચીફ ફાયર ઓફિસર, ખોરાક શાખા, ફાયલેરિયા શાખા, ઝુ વિભાગ, ટુરિસ્ટ શાખા, દબાણ શાખા, એડિશનલ સિટી એન્જિનિયર, સિક્યોરિટી શાખા, આસિ. કમિશનર, કાર્યપાલક ઇજનેર સહિત અનેક મહત્વની પોસ્ટ પર જગ્યા ખાલી છે. જેથી એક-એક અધિકારીને 2થી 3 ખાતાના ચાર્જ સોંપવામાં આવ્યા છે. ત્યારે પાલિકાના કોંગ્રેસ નેતાએ અધિકારીઓના શોષણનો આક્ષેપ કર્યો. સાથે કરાર આધારિતના બદલે કાયમી ભરતીની પ્રક્રિયા વહેલી પૂરી કરવા માંગ કરી છે. જેથી અધિકારી કર્મચારી પર કામનું ભારણ ઘટી શકે. બીજી તરફ પાલિકાના સ્ટેન્ડિંગ કમિટીના ચેરમેને કહ્યું કે કર્મચારીઓની ઘટ પૂરવા ટેમ્પરરી 11 માસના કરાર આધારિત કર્મચારીઓની ભરતી કરવા મંજૂરી આપી છે. આગામી સમયમાં તમામ ખાલી પોસ્ટ કાયમી ધોરણે ભરવામાં આવશે.

હાલમાં કોર્પોરેશનમાં કેટલી જગ્યાઓ છે ખાલી?

• વર્ગ 1ની મંજૂર કરેલ 64 માંથી 23 જગ્યા ભરેલી, 41 ખાલી 
• વર્ગ 2ની મંજૂર કરેલ 327 માંથી 226 જગ્યા ભરેલી, 101 ખાલી 
• વર્ગ 3ની મંજૂર કરેલ 3330 માંથી 1551 જગ્યા ભરેલી, 1779 ખાલી 
• કુલ - 3721 જગ્યામાંથી 1800 જગ્યા ભરેલી છે, જ્યારે 1921 જગ્યા ખાલી

હાલમાં વડોદરા મનપામાં કર્મચારી અધિકારીની પડી રહી છે ઘટ

ઉલ્લેખનીય છે કે, તાજેતરમાં જ વડોદરા પાલિકાએ તમામ 19 ઇલેક્શન વોર્ડમાં 19 વહીવટી વોર્ડ ઑફિસ શરૂ કરી છે. જેમાં નવી 7 વોર્ડ ઓફિસ શરૂ કરી છે. જેને લઇને કર્મચારી અધિકારીની ભારે ઘટ પડી રહી છે. આ ઘટ પૂરવા પાલિકાએ ભરતી બહાર પાડી પણ આગળ કોઈ કાર્યવાહી ન થતાં ઉમેદવારોના ભાવિને લઈ અનેક સવાલો ઉઠવા પામ્યા છે.