વડોદરાના કમિશનર અજય ભાદુને રાષ્ટ્રપતિના સેક્રટરી બનાવવામાં આવ્યા છે. અજય ભાદુની સંયુક્ત સેક્રેટરી તરીકે નિમણુંક કરાઇ છે. ગુજરાતમા લાંબા સમય સુધી ફરજ બજાવી ચુક્યા છે.
વડોદરા મ્યુનિસિપલ કમિશનર તરીકે ફરજ બજાવતા અજય ભાદુની નિમણુંક રામનાથ કોવિંદના સંયુક્ત સેક્રેટરી તરીકે થઇ છે. 1999ની બેચના ગુજરાત કેડરના વધુ એક આઇએએસ અધિકારી નવી દિલ્હી જઇ રહ્યા છે. ધ એપોઇન્ટમેન્ટ કમિટી ઓફ ધ કેબિનેટ દ્વારા આ નિમણૂંક કરવામાં આવી છે.
જાણો અજય ભાદુ વિશે...
અજય ભાદુનો જન્મ 11 ફેબ્રુઆરી 1971ના રોજ રાજસ્થાનમાં થયો હતો. અજય ભાદુએ જયપુરમાં નેશનલ ઈન્સ્ટીટ્યુટ ઓફ ટેક્નોલોજીમાંથી સિવિલ એન્જિનિયરિંગ અને બેંગાલુરૂની નેશનલ લો સ્કૂલ યુનિવર્સિટીમાંથી બિઝનેસ લોમાં પોસ્ટ ગ્રેજ્યુએશન કર્યું હતું.
મહત્વનું છે કે, વર્ષ 2008 અને 2010માં અજય ભાદુને બેસ્ટ કલેક્ટરનો એવોર્ડ મળી ચૂક્યો છે. વડોદરા મ્યનિસિપલ કમિશનર પહેલા તેઓ ગુજરાત મેરીટાઇમ બોર્ડના સીઇઓ અને વાઇસ ચેરમેન હતા. આ અગાઉ તેઓ જીઆઇડીબીમાં સીઇઓ તરીકે ફરજ નિભાવી ચૂક્યા છે. તેઓ તત્કાલિન મુખ્યમંત્રી આનંદીબહેન પટેલના કાર્યકાળ દરમિયાન સીએમઓમાં સેક્રેટરી તરીકે ફરજ નિભાવી ચૂક્યા છે. સાથે સુરત અને જૂનાગઢમાં મદદનિશ કલેક્ટર, ભરૂચ અને મહેસાણામાં જિલ્લા વિકાસ અધિકારી, મહેસાણા જિલ્લા કલેક્ટર, રાજકોટ મ્યુનિસિપલ કમિશનર જેવા પદો પર ફરજ નિભાવી ચૂક્યા છે.