ના હોય! / કૌભાંડ : વડોદરાની આ લેબ બનાવી આપતી હતી જેવા જોઈએ એવા બ્લડરિપોર્ટ

• એડિયો ક્લીપ થઈ રહી છે વાઈરલ
• સામાન્ય તાવ શરદીમાં પણ કરાવાય છે ટેસ્ટ
• લેબ સંચાલક પાસે નથી ડિગ્રી

વડુની ઘટના બાદ લોકોને લેબોરેટરીઓ છેતરતી હોવાની શંકા સેવાઈ રહી છે. મનઘડત રિપોર્ટ બનાવી લોકોને છેતરવામાં આવતા હોવાનો આક્ષેપ કરાયો છે. રિપોર્ટમાં ગડબડને લઈને લોકો મુંઝવાયા છે. એક રિપોર્ટના લેબોરેટરી દ્વારા 250થી 700 રૂપિયા સુધી વસુલવામાં આવે છે. પૈસા લીધા બાદ પણ ખોટા રિપોર્ટ જાહેર કરવામાં આવે છે. જેથી લોકોએ કડક કાર્યવાહી કરવાની માગ કરી છે.

સામાન્ય તાવ શરદીમાં પણ કરાવાય છે ટેસ્ટ
આજકાલ સામાન્ય તાવ શરદીમાં પણ બ્લડ રિપોર્ટથી લઈને બીજા નાના મોટા રિપોર્ટ કરાવવા ડોક્ટર લેપોરેટરીમાં મોકલી દે છે જેને પરિણામે ખાનગી પેથોલોજીકલ લેબોરેટરીઓનો રાફડો ફાટયો છે. આવી લેબોરેટરીઓના રિપોર્ટનું એક મોટું કૌભાંડ ચાલી રહ્યું છે. કેટલાક લેભાગુ ડોક્ટરો અને લેબોરેટરી સંચાલકોની મીલિભગતના પર્દાફાશ થયા છે. 

એડિયો ક્લીપ થઈ રહી છે વાઈરલ
વડોદરા જિલ્લાના પાદરા તાલુકાના છેવાડાના વડુમાં આવેલી એક લેબોરેટરીના સંચાલકની ઓડિયો ક્લીપ ફરતી થઈ છે જેમાં ખાનગી પેથોલોજીકલ લેબોરેટરીનું કૌભાંડ સામે આવ્યુ છે. આ ક્લીપ બહાર આવતાં એ લેબને સીલ કરવાની દોડધામ તંત્ર દ્વારા તજવીજ હાથ ધરવામાં આવી છે. 

લેબ સંચાલક પાસે નથી ડિગ્રી
વડોદરા જિલ્લાના વડુ ગામની સ્વરા પેથોલોજી લેબોરેટરી ના નામની વાઇરલ થયેલી ઓડિયો ક્લિપના પગલે જિલ્લા આરોગ્ય તંત્ર દોડતું થઇ ગયું છે. પાદરાના આરોગ્ય અમલદારની તપાસમાં લેબ સંચાલકની ડિગ્રી જોવા નહીં મળતાં તેમણે લેબને સીલ મારી પોલીસને જાણ કરી છે.

કોણ છે ડોક્ટર અને લેબ સંચાલન
વડુ ગામના એક મકાનમાં વડોદરાના અટલાદરા વિસ્તારની સ્વરા પેથોલોજી લેબોરેટરીના સંચાલક ડો.જૈમિન શાહે થોડા સમય પહેલાં એક કલેક્શન સેન્ટર શરૂ કર્યું હતું. જેનું સંચાલન સુનિલ સુર્વે કરતા હોવાની માહિતી આરોગ્ય અધિકારીને મળી છે.

શું છે ઓડિયો ક્લીપમાં
વડુની સ્વરા લેબની વાઇરલ થયેલી ઓડિયો ક્લિપમાં લેબના  સચિન નામના કહેવાતા સંચાલક  સાથે એક અજાણી વ્યક્તિ પોતાનું નામ  ડોક્ટર વિશ્વાસ તરીકે કહી વાતચીત કરે છે અને તેમાં ભઠ્ઠા વિસ્તારમાં દર્દીઓ મોટી સંખ્યામાં મળે તેમ છે પરંતુ રિપોર્ટ અમે કહીએ તે મુજબ કરી આપવાનો રહેશે. તેમ એ  કહેવાતો ડોક્ટર કહે છે.

લેબ સંચાલક કહે છે તમે કહેશો તેવા રિપોર્ટ બનાવી આપીશુ
લેબમાંથી સચિન જોશી નામની વ્યક્તિ વળતો ફોન કરી અજાણી વ્યક્તિ સાથે બધું વર્ક મને આપજો.અમારી ચાર લેબ 365 દિવસ ચાલુ હોય છે.તમે કહેશો તે મુજબ મેલેરિયા, ટાઇફોઇડ કે બીજા કોઇ પણ રિપોર્ટ બનાવી આપીશું.

લેબને કરવામાં આવી સીલ
ઓડિયો ક્લિપના મુદ્દે ઊહાપોહ થતાં વડોદરા જિલ્લાના પાદરા તાલુકા હેલ્થ ઓફિસર દોડી ગયા હતા અને તેમણે લેબ સંચાલક પાસે ડિગ્રી માંગી હતી. લેબ સંચાલક  ત્યાં હાજર નહોતો અને સ્ટાફે સંચાલકની ડિગ્રી  રજૂ નહીં કરતાં તાલુકા હેલ્થ ઓફિસરે લેબને સીલ કરી વડુ પોલીસને રિપોર્ટ કર્યો છે.