કાર્યવાહી / નશાની હાલતમાં ઝડપાયા વડોદરા યુથ કોંગ્રેસના પ્રમુખ, પોતે જ દારૂ માટે પોલીસ પર લગાવતા હતા આરોપ

• દારૂના નશામાં ઝડપાયો વડોદરા જિલ્લા યુથ કોંગ્રેસ પ્રમુખ
• કરજણ પોલીસે વાહન ચેકીંગ દરમિયાન ઝડપી પાડ્યો
• ભૌમિક પટેલે fb પર કરજણ પોલીસ સામે ગંભીર આક્ષેપ 

દારૂના નશામાં ચકચૂર થયેલી હાલતમાં વડોદરા જિલ્લા યુથ કોંગ્રેસ પ્રમુખને કરજણ પોલીસે ઝડપી પાડ્યો છે. કરજણ નેશનલ હાઇવે નંબર 48 ભરથાના ટોલ પ્લાઝા પાસેથી પોલીસે યુથ કોંગ્રેસ પ્રમુખ ભૌમિક પટેલને ઝડપી પાડ્યો.

ભૌમિકે અચાનક કાર સુરત તરફ યુ-ટર્ન મારતા પોલીસને શંકા ગઇ

કરજણ પોલીસે વાહન ચેકીંગ દરમિયાન તેને ઝડપી પાડ્યો હતો. ભૌમિક પટેલે કાર અચાનક પરત સુરત તરફ યુ-ટર્ન મારતા પોલીસને શંકા જતા પોલીસે કારનો પીછો કર્યો હતો. દરમ્યાન પોલીસે દારૂના નશામાં ચકચૂર જિલ્લા યુથ કોંગ્રેસ પ્રમુખને ઝડપી પાડ્યો હતો.

ભૌમિક પટેલે ફેસબુક પર કરજણ પોલીસ સામે કર્યા છે આક્ષેપ

તમને જણાવી દઇએ કે, ભૌમિક પટેલે ફેસબુક પર કરજણ પોલીસ સામે આક્ષેપ કર્યા છે. પોલીસ અને MLA વિરુદ્ધ ખુલ્લેઆમ દારૂ વેચાણના ભૌમિક પટેલે આક્ષેપો કર્યા છે. હાલમાં કરજણ પોલીસે આ મામલે પ્રોહીબિશન કલમ - ૬૬ (૧) બી. મુજબ ગુનો નોંધી કાયદેસરની કાર્યવાહી હાથ ધરી છે.

આક્ષેપ કરતા કહ્યું, 'કરજણમાં દેશી દારૂનો ધંધો કરજણ પોલીસ સ્ટેશનના મદદથી થાય છે'

ઉલ્લેખનીય છે કે, વડોદરા જિલ્લા યુથ કોંગ્રેસ પ્રમુખ ભૌમિક પટેલે પોતાના ફેસબુક એકાઉન્ટ પર કરજણ પોલીસ અને MLA વિરૂદ્ધ આક્ષેપ લગાવતા કહ્યું છે કે, 'કરજણના દેશી દારૂવાડા પાસે પોલીસ ભરણ લે છે. કરજણમાં દેશી દારૂનો ધંધો કરજણ પોલીસ સ્ટેશનના મદદથી થાય છે.'