ગુજરાતમાં દારૂબંધી ચરમ પર છે ત્યારે, બે ખાખીધારીઓએ,બે યુવકો પાસે દારૂનો વેપલો શરુ કરવા બે યુવકોને ફટકાર્યા .
ગુજરાતમાં દારૂબંધીની ઐસી-તૈસી
પોલીસનું બે યુવકો પર દારુ વેંચવા દબાણ
દબાણ કરવા સાથે પોલીસ મથકમાં માર્યો માર
ગુજરાતમાં દારૂબંધી ચરમ પર છે ત્યારે, બે ખાખીધારીઓએ,બે યુવકો પાસે દારૂનો વેપલો શરુ કરવા અને પોતાને જેની સાથે અંગત દુશ્મની છે તેવાને ફસાવવાનો કારસો રચીને બે યુવકોને ફટકાર્યા હતા. પોતે દારૂના ધંધામાંથી છૂટવા માંગતા હોવા છતાં પોલીસ જ વેપલો શરુ કરવા દબાણ કરે છે. વડોદરાના સમા વિસ્તારની આ ઘટના છેક ગાંધીનગર સુધી ચર્ચાઈ રહી છે.
ધંધો શરુ કરો.'ભરણ'આપો -પોલીસ
ગુજરાતમાં કડક દારૂબંધી છે આવા સમયે કેટલાય ગ્રામ્ય અને શહેરી વિસ્તારોમાં પોલીસની સાંઠ-ગાંઠ નીચે દેશી કે વિદેશી દારૂનો ધંધો ધમધોકાર ચાલતો હોવાની ચર્ચા એરણે છે. ત્યારે,વડોદરાના સમા વિસ્તારમાં પોલીસે બે યુવકોને ધંધો ફરી શરુ કરવા અને પોલીસની ભાષામાં જેને 'ભરણ' કહેછે ( હપ્તા )તે આપવા દબાણ કરી માર માર્યો હોવાની વાત સામે આવી છે.VTVને આપેલી કેફિયતમાં પોલીસથી પીડિત એવા બન્ને યુવકોએ વાત કરી કે ,પોલીસ ફરીથી દારૂનો ધંધો શરુ કરાવવા માંગે છે.
બીજાને ફસાવ-તારા પૈસા નહિ લઈએ -પોલીસ
આટલું અપૂરતું હોય તેમ,પોલીસે એક યુવકને દારૂનો ધંધો શરુ કર્યા બાદ,અન્ય શખ્સ વેચતો હોવાની વાત કરી બીજાને ફસાવી દેવા પણ દબાણ કર્યું હતું. પોલીસને જેમની સાથે અંગત દુશ્મની છે તેનું નામ આપી દારૂનો જથ્થો તેનો હોવા અંગે નામ ખોલવા દબાણ કર્યું હતું.
ત્રણ પોલીસકર્મી સામે પગલાં લો
પોલીસે આ બન્ને યુવકોને ઉઠાવી લઇ જઈ પોલીસ મથકમાં જ માર માર્યો હતો. બાદમાં,આ યુવકોએ હોસ્પીટલમાં દાખલ થવું પડ્યું હતું.આ બન્ને યુવકોએ પોલીસ કમિશનર શમશેર સિંહ પાસે ન્યાય માટે 'ધા'નાખી છે.સમા પોલીસના આનંદસિંહ,સુનીલ ડાભી સહીત અન્ય એક પોલીસકર્મી સામે કાર્યવાહી કરવા માંગ કરાઈ છે.વડોદરાના સમા વિસ્તારમાં બનેલી આ ઘટના ગુજરાતની સ્થિતિનો એક નાનો નમૂનો છે રાજ્યભરમાં ખૂણે-ખાંચરે ચાલતા દારૂના 'ટમટમિયા' કોઈ મોટી સાંઠ-ગાંઠ હેઠળ ધમધમતા હોવાની શક્યતા પણ નકારી શકાય નહિ.