BCCI ક્રિકેટની દુનિયાનું સૌથી અમીર બોર્ડ છે, એટલે સુધી કે બીસીસીઆઇના અધ્યક્ષ સૌરવ ગાંગુલીએ ઘરેલુ ક્રિકેટરોની આર્થિક સ્થિતિ સુધારવાની કવાયત શરૂ કરી દીધી છે.
વી. જયદેવનની વ્યથા
BCCIએ ઉપયોગ કરી વીજેડી મેથડ પણ ન કરી આર્થિક સહાય
સબા કરીમ આ મામલાને બોર્ડમાં ઉઠાવશે
આમ છતાં એક શખ્સ એવો છે, જેનું ભારતીય ઘરેલુ ક્રિકેટની લગભગ 500 મેચમાં મહત્વપૂર્ણ યોગદાન છે, પરંતુ બીસીસીઆઇ તરફથી તેને લગભગ બારેક વર્ષથી ફૂટી કોડી પણ ચૂકવવામાં આવી નથી, જોકે હવે બીસીસીઆઇના જનરલ મેનેજર (ક્રિકેટ ઓપરેશન્સ) સબા કરીમ આ મામલાને બોર્ડના ટોચના અધિકારીઓ સમક્ષ ઉઠાવવાના છે.
કેવી રીતે થાય છે આ મેથડનો ઉપયોગ ?
ભારતના ઘરેલુ ક્રિકેટમાં લગભગ બારેક વર્ષથી વરસાદગ્રસ્ત મેચોનું પરિણામ લાવવા માટે વીજેડી મેથડનો ઉપયોગ કરવામાં આવી રહ્યો છે, પરંતુ આ મેથડ બનાવનારા વી. જયદેવનને બીસીસીઆઇ તરફથી છેલ્લા દાયકાથી કોઈ પણ જાતની આર્થિક મદદ મળી નથી.
12 વર્ષ દરમિયાન અનેક મેચમાં વીજેડી મેથડનો થયો ઉપયોગ
વી.જયદેવને જણાવ્યું, ''છેલ્લાં 12 વર્ષ દરમિયાન ઘરેલુ ક્રિકેટની 500 મેચનાં પરિણામ વીજેડી મેથડનો ઉપયોગ કરીને નક્કી કરવામાં આવ્યાં છે એટલે સુધી કે ટી-૨૦ લીગ- કર્ણાટક પ્રીમિયર લીગ અને તામિલનાડુ પ્રીમિયર લીગમાં પણ આ મેથડનો ઉપયોગ કરવામાં આવ્યો છે, પરંતુ જ્યાં સુધી છેલ્લા બે દાયકાના મારા પ્રયાસોની વાત છે ત્યાં સુધી ના તો મને કોઈ જાતની ઓળખ મળી છે કે ના તો કોઈ આર્થિક લાભ.''
500 થી વધુ મેચનું પરિણામ વીજેડી નિયમ પ્રમાણે થયું નક્કી
વી. જયદેવને નિર્ધારિત ઓવરના ફોર્મેટમાં વરસાદના કારણે સંશોધિત લક્ષ્ય નક્કી કરવા માટે વીજેડી મેથડ વિકસાવી હતી. ઘણા લોકો આને આંતરરાષ્ટ્રીય સ્તર પર ઉપયોગમાં લેવાતી ડક્વર્થ-લૂઇસ મેથડ કરતાં પણ સારી માને છે. બીસીસીઆઇએ બધી જ ઘરેલુ મેચમાં વીજેડી મેથડનો ઉપયોગ કરવાની શરૂઆત સપ્ટેમ્બર-2007થી કરી હતી. ત્યાર બાદ 500 થી વધુ મેચનું પરિણામ વીજેડી નિયમ પ્રમાણે નક્કી કરાઈ ચૂક્યું છે. જયદેવન હાલ આ પદ્ધતિને વધુ સારી બનાવવાના પ્રયાસ કરી રહ્યો છે, પરંતુ નાણાંના અભાવે તેનો રસ્તો રોકી દીધો છે.
વર્ષ 2009માં મળી 5 લાખની સહાય
વી. જયદેવને કહ્યું, ''શરૂઆતમાં મેં આ પદ્ધતિના વિકાસ માટે આર્થિક મદદ માગી હતી. ત્યાર બાદ કેરળ ક્રિકેટ એસોસિયેશનના સચિવ ટી. સી. મેથ્યૂ મને બીસીસીઆઇના ભૂતપૂર્વ અધ્યક્ષ એન. શ્રીનિવાસનની ઓફિસે લઈ ગયા હતા. જ્યાં વર્ષ 2009માં મને પાંચ લાખ રૂપિયાની આર્થિક મદદ મળી હતી, પરંતુ ત્યાર બાદ બીસીસીઆઇ તરફથી મને ફૂટી કોડી પણ મળી નથી. હું આ મેથડના વર્તમાન સ્વરૂપની સરખામણીએ વધુ સરળ બનાવવા ઇચ્છું છું, જેથી તેનો ઉપયોગ કરવામાં વધુ સુવિધા મળી શકે.''