ઉત્તરાખંડના ચમોલીમા તપોવનમાં ગ્લેશિયર તૂટી પડ્યા બાદ પૂરનું પાણી અત્યંત ઝડપથી નીચણવાળા વિસ્તારો તરફ ધસતા યુપીના ઘણા જિલ્લામાં એલર્ટ જારી કરી દેવાયું છે
ગંગા નદીના કિનારાએ વસેલા લોકોને નદી આજુબાજુ ન ફરકવાની ચેતવણી અપાઈ છે.
વહિવટી તંત્ર દ્વારા ટિહરી ડેમમાંથી પાણીના પ્રવાહને રોકી દેવાયું છે. રુદ્રપ્રયાગમાં પણ હાઈએલર્ટ જારી કરે દેવાયું છે.
મેરઠ જિલ્લા પ્રશાસન તંત્ર દ્વારા ગંગા કિનારના વિસ્તારોમાં વિશેષ સાવધાની રાખવામાં આવી રહી છે
યુપીમાં પણ હાઈએલર્ટ
યુપીના ઉન્નાવમાં જિલ્લાધિકારી દ્વારા ગંગા કિનારે વસેલા લગભગ 350 ગામોમાં હાઈએલર્ટ જારી કરી દેવાયું છે. ફરુખાબાદમાં પણ ગંગા નદીના પ્રવાહ પર ચાંપતી નજર રખાઈ રહી છે. હાલમાં ગંગાનો પ્રવાહ સામાન્ય છે પરંતુ ગમે ત્યારે વધવાની શંકા રહી હોવાથી પ્રશાસન તંત્ર એલર્ટ પર છે. બિજનોરમાં પણ એલર્ટ જારી કરવામાંઆવ્યું છે. ગંગા કિનારે વસતા લોકોને સલામત સ્થળે ખસેડાઈ રહ્યાં છે.
અમરોહના 51 ગામોમાં પણ એલર્ટ
અમરોહના 51 ગામોમાં પણ એલર્ટ જારી કરાયું છે. મેરઠ જિલ્લા પ્રશાસન તંત્ર દ્વારા ગંગા કિનારના વિસ્તારોમાં વિશેષ સાવધાની રાખવામાં આવી રહી છે.પ્રાથમિક માહિતી અનુસાર, આ હોનારતથી 10,000 લોકો પ્રભાવિત થયાં હોવાની પણ માહિતી મળી રહી છે. તેમાં એવા લોકો પણ છે જે નદીના કાંઠે રહેતા હતા. વળી, એવા મજૂરો પણ છે જે ડેમમાં કામ કરતા હતા. આઇટીબીપી ઉત્તરાખંડ પોલીસ નેશનલ ડિઝાસ્ટર રિલીફ ફોર્સ અને સ્ટેટ ડિઝાસ્ટર રિલીફ ફોર્સની ટીમ સ્થળ પર રવાના થઈ છે.
ઉત્તરાખંડમાં ફરી એક વાર કુદરતી કોપ
ઉત્તરાખંડમાં ફરી એક વાર કુદરતી કોપ સર્જાયો છે. રાજ્યના ચમોલીના રેણી ગામ નજીક એક મહાકાય ગ્લેશિયર(હિમશીલા) તૂટી પડતા ભારે ખાનાખરાબી સર્જાઈ હતી. હિમશીલા તૂટી પડવાને કારણે ચમોલીના જોશીમઠ વિસ્તારની ધોળીગંગા નદીમાં ઘોડાપૂર આવ્યું હતું. સૌથી વધારે તબાહી ઋષિગંગા પાવર પ્રોજેક્ટની થઈ હતી.પાવર પ્રોજેક્ટમાં કામ કરતા 100-150 લોકો લાપત્તા થયા છે તથા અત્યાર સુધી 10 લોકોની લાશ મળી આવી છે. સ્થાનિક વહીવટી તંત્રને સમાચાર મળતા જ ઘટના સ્થળે રાહત કામગીરી પહોંચાડવા તજવીજ હાથ ધરી હતી. આ ઘટનાને પગલે સ્થાનિકોના ઘરને મોટાપાયે નુકસાન પહોંચ્યું છે.