રાજકારણ / 2022માં જીત પાક્કી? UPમાં એક બાદ એક સ્થાનિક ચૂંટણીઓમાં ભાજપની બમ્પર જીત

• 2022 પહેલા ભાજપ ગેલમાં 
• એક બાદ એક ચૂંટણીમાં ભાજપની બલ્લે બલ્લે 
• કોંગ્રેસને સૌથી મોટી નિરાશા, સમાજવાદીના પણ સૂપડા સાફ 

UPDATE : 7.49 PM, 10-07-2022

યુપીમાં ભાજપનો જબરદસ્ત દબદબો જોવા મળી રહ્યો છે. અત્યાર સુધીમાં 635 પર ભાજપની જીત થઈ છે. 

સ્થાનિક ચૂંટણીઓમાં ભાજપની ઐતિહાસિક જીત 
વર્ષ 2022માં ઉત્તર પ્રદેશમાં વિધાનસભાની ચૂંટણી થવાની છે ત્યારે આ ચૂંટણી પહેલા સ્થાનિક તંત્રની ચૂંટણીઓમાં ભાજપની ઐતિહાસિક જીત થઈ રહી છે. હાલમાં જ જિલ્લા પંચાયત ચૂંટણીના પરિણામોમાં આખા ઉત્તર પ્રદેશમાં ભાજપની બમ્પર જીત થઈ હતી જ્યારે હવે આજે બ્લૉક પ્રમુખની ચૂંટણીમાં પણ ભાજપની બલ્લે બલ્લે દેખાઈ રહી છે. આખા રાજ્યમાં સમાજવાદી પાર્ટી, બહુજન સમાજ પાર્ટી અને કોંગ્રેસના સૂપડા સાફ થઈ ગયા છે. ભાજપની આવી બમ્પર જીતના કારણે રાજ્યમાં ભાજપના કાર્યકરોમાં ભારે ઉત્સાહ જોવા મળી રહ્યો છે. સીએમ યોગી આદિત્યનાથે આ જીતનો શ્રેય પણ પીએમ મોદીને આપ્યો છે અને સાથે સાથે કાર્યકરોને શુભકામનાઓ પણ પાઠવી છે. 

500થી વધારે બેઠકો પર ભાજપનો ભગવો 
શનિવારે આવેલ બ્લોક પ્રમુખ ચૂંટણીના પરિણામો સામે આવી રહ્યા છે અને મતગણતરી ચાલુ છે. ભારતીય જનતા પાર્ટીની આ ચૂંટણીમાં બમ્પર જીત દેખાઈ રહી છે. અત્યારે સુધી આવેલા પરિણામો અનુસાર 825માંથી 549 બેઠકો પર ભગવો લહેરાયો છે જ્યારે સમાજવાદી પાર્ટી માત્ર 73 પર સમેટાઇ ગઈ છે. આ સિવાય 98 બેઠકો અન્યના ખાતામાં ગઈ છે. 2022માં પ્રિયંકા ગાંધીના દમ પર યુપીમાં તાલ ઠોકવાના દાવા કરતી કોંગ્રેસ માત્ર 3 સીટ પર જ જીત મેળવી શકી છે. 

નોંધનીય છે કે 349 બ્લૉક પ્રમુખ નિર્વિરોધ ચૂંટાયા છે જેમાંથી ભાજપનો દાવો છે કે 334 બ્લૉક પ્રમુખ ભાજપના છે.