અમેરિકામાં ફરી એક વખત કોરોનાનો પ્રકોપ વધી રહ્યો છે. જો છેલ્લાં 24 કલાકની વાત કરીએ તો અમેરિકામાં કોરોના વાયરસના સંક્રમણને કારણે 1000થી વધુ લોકોએ પોતાના જીવ ગુમાવ્યાં છે. રિપોર્ટ મુજબ, દર કલાકે અમેરિકામાં 42 મોત કોરોનાના કારણે થયા છે.
મહત્વનું છે કે, અમેરિકામાં કોરોનાના ડેલ્ટા વેરિએન્ટનો પ્રકોપ વધી રહ્યો છે. માર્ચ મહિના બાદ પ્રથમ વખત અમેરિકામાં આટલા મોટા પાયા પર કોરોનાના કારણે મોત થયા છે. એક અહેવાલ મુજબ, મંગળવારે અમેરિકામાં કોરોના સંક્રમણને કારણે 1017 લોકોના મોત થયા હતા. અમેરિકામાં કોરોના મહામારીને કારણે અત્યાર સુધી 6 લાખ 30 હજારથી વધુ લોકોએ પોતાના જીવ ગુમાવ્યાં છે. અમેરિકા આખી દુનિયામાં કોરોનાથી થતાં મોતમાં નંબર વન રહ્યું છે. દેશમાં કોરોનાના વધી રહેલા કોરોના કેસોને ધ્યાનમાં રાખીને ફરી એક વખત માસ્ક લગાવવા માટે કહેવામાં આવ્યું છે.
છેલ્લાં 1 મહિનામાં કોરોનાનો મૃત્યુઆંક વધ્યો
એક અહેવાલ મુજબ, અમેરિકામાં છેલ્લાં એક મહિનામાં કોરોનાથી થતાં મૃત્યુઆંકમાં ઉછાળો જોવા મળ્યો છે. ગયા મહિને દૈનિક ઓછામાં ઓછા 769 લોકોએ પોતાનો જીવ કોવિડ-19ના કારણે ગુમાવ્યો છે. છેલ્લાં 12 દિવસથી દેશમાં દરરોજ કોરોનાના એક લાખથી વધુ કેસો સામે આવી રહ્યાં છે. અમેરિકાના ફ્લોરિડામાં છેલ્લાં એક અઠવાડિયામાં 26 હજારથી વધુ કોરોનાના નવા કેસો સામે આવ્યાં છે.
કોરોનાને કંટ્રોલ કરવા બાઈડન સરકાર પ્રયત્નશીલ
ઉલ્લેખનીય છે કે, અમેરિકા સહિત આખા વિશ્વમાં કોરોનાનો નવો વેરિએન્ટ ડેલ્ટા હાહાકાર મચાવી રહ્યો છે. દુનિયાભરના ઘણાં દેશોમાં સંક્રમિત દર્દીઓની સંખ્યા વધી રહી છે. અમેરિકામાં કેસ વધતાની સાથે હોસ્પિટલમાં બેડની અછત જોવા મળી રહી છે. તો કોરોનાને કંટ્રોલ કરવા માટે બાઈડન સરકાર પ્રયાસ કરી રહી છે.