અમેરિકા અને ચીન વચ્ચે છેલ્લા 18 મહિનાથી ચાલતી ટ્રેડ વોર હવે સમાપ્ત થવાના આરે છે. અમેરિકાના રાષ્ટ્રપ્રમુખ ડોનાલ્ડ ટ્રમ્પે એક નિવેદનમાં જણાવ્યું છે કે ટ્રેડ ડીલના મામલે ચીનના રાષ્ટ્રપ્રમુખ શી જિનપિંગ સાથે સારી વાત થઇ છે. અત્રે ઉલ્લેખનીય છે કે અમેરિકા અને ચીન વચ્ચે વ્યાપાર કરારના પ્રથમ તબક્કાના મુસદ્દા પર સંમતિ સધાઇ ગઇ છે.
અમેરિકા અને ચીન ફરી દોસ્તીના સૂર
ટ્રેડ વોર સમાપ્ત થવાને આરે
હવે એવું માનવામાં આવી રહ્યું છે કે બંને દેશ વચ્ચે ટૂંક સમયમાં ટ્રેડ વોર સમાપ્ત થઇ જશે. અમેરિકાના રાષ્ટ્રપ્રમુખ ડોનાલ્ડ ટ્રમ્પે ટ્વિટ કરીને જણાવ્યું છે કે ચીનના રાષ્ટ્રપ્રમુખ સાથે અમારા વિશાળ વ્યાપાર કરાર પર સારી વાતચીત થઇ છે. ચીને અગાઉ પણ અમારી કૃષિ પ્રોડક્ટ્સ અને અન્ય ચીજવસ્તુની મોટા પાયે ખરીદી શરૂ કરી દીધી છે.
ઔપચારિક હસ્તાક્ષર બાકી
હવે ઔપચારિક હસ્તાક્ષર માટે વ્યવસ્થા કરવામાં આવી રહી છે. આ ઉપરાંત અમારી નોર્થ કોરિયા અને હોંગકોંગના મુદ્દે પણ વાતચીત થઇ છે, જોકે ટ્રમ્પે એ જાહેર કર્યું નથી કે બંને દેશ વચ્ચે વ્યાપાર સમજૂતી પર હસ્તાક્ષર ક્યારે કરવામાં આવશે.
ટ્રેડ વોર સમાપ્ત થવાના આરે
બંને દેશ વચ્ચે હવે ટ્રેડ વોર સમાપ્ત થવાના આરે છે એવા સમાચાર માત્ર અમેરિકા અને ચીન માટે જ નહીં, પરંતુ સમગ્ર વિશ્વના અર્થતંત્ર માટે રાહતની વાત છે. અમેરિકા અને ચીન વચ્ચે વ્યાપાર સમજૂતીના સમાચારથી દુનિયાએ રાહતનો શ્વાસ લીધો છે, કારણ કે આ ટ્રેડ વોરના કારણે વૈશ્વિક અર્થતંત્ર ખરાબ રીતે પ્રભાવિત થયું છે.
ચીને અમેરિકાના એ કેમિકલ્સની યાદી જાહેર કરી
ચીને અમેરિકાના એ કેમિકલ્સની યાદી જાહેર કરી છે, જેના પર ઇમ્પોર્ટ ડ્યૂટીમાં છૂટ આપવામાં આવશે. આમ, બંને દેશો વચ્ચે વ્યાપાર કરાર પર સંમતિ સધાઇ છે, જેના કારણે હવે વિવાદ શમી ગયો છે. હવે બંને દેશો વચ્ચે માત્ર વ્યાપાર કરાર પર હસ્તાક્ષર કરવાની ઔપચારિકતા જ બાકી છે.