કાર્યવાહી / સોમાલિયામાં ISISના આતંકીને લાદેનની સ્ટાઈલમાં અમેરિકન સેનાએ કર્યો ઠાર, અન્ય 10ને પણ ઉડાવી દીધા

• અમેરિકી સેનાએ ઉત્તરી સોમાલિયામાં ISISના આતંકવાદીને મારી નાંખ્યો 
• સેનાએ  આતંકવાદી બિલાલ અલ-સુદાનીને તેના 10 સાથીઓ સાથે મારી નાખ્યો
• આફ્રિકામાં ISISને વિસ્તારવા મોટી યોજના બનાવી રહ્યો બિલાલ અલ-સુદાની

અમેરિકી સેનાએ ઉત્તરી સોમાલિયામાં ઈસ્લામિક સ્ટેટ (ISIS)ના આતંકવાદી બિલાલ અલ-સુદાનીને તેના 10 સાથીઓ સાથે મારી નાખ્યો છે. 2011માં પાકિસ્તાનના એબોટાબાદમાં જે રીતે અમેરિકી સેનાએ મોસ્ટ વોન્ટેડ આતંકવાદી ઓસામા બિન લાદેનને માર્યો હતો તેવી જ રીતે અમેરિકન સેનાએ બિલાલ અલ-સુદાનીને મારી નાખ્યો હતો.

અમેરિકી અધિકારીઓના જણાવ્યા અનુસાર, બિલાલ અલ-સુદાની સમગ્ર આફ્રિકામાં આઇએસઆઇએસને વિસ્તારવા અને અન્ય ગતિવિધિઓને અંજામ આપવા માટે એક મોટી યોજના બનાવી રહ્યો હતો. બુધવારે અમેરિકી સૈન્ય ઓપરેશને પર્વતીય ગુફા સંકુલની અંદર બિલાલ અલ-સુદાનીને નિશાન બનાવ્યો હતો. બિલાલ ગ્લોબલ ટેરરિસ્ટ ઓર્ગેનાઈઝેશન માટે મોટો નાણાકીય સહાયક હતો.

યુએસ સંરક્ષણ સચિવ લોયડ ઓસ્ટિને જણાવ્યું હતું કે, આ ઓપરેશન યુનાઇટેડ સ્ટેટ્સ અને તેના સાથી દેશોને વધુ સુરક્ષિત બનાવે છે, અને તે અમેરિકનોને દેશ અને વિદેશમાં આતંકવાદના ખતરાથી બચાવવા માટેની અમારી અતૂટ પ્રતિબદ્ધતા દર્શાવે છે. લોયડે જણાવ્યું કે આ મિશન મહિનાઓના આયોજન બાદ તૈયાર કરવામાં આવ્યું હતું. રાષ્ટ્રપતિ જો બિડેનને ગયા અઠવાડિયે જ આ મિશન વિશે જાણ કરવામાં આવી હતી. ઓસ્ટિન અને જોઈન્ટ ચીફ ઓફ સ્ટાફના અધ્યક્ષ આર્મી જનરલની ભલામણને પગલે બિડેને આ અઠવાડિયે ઓપરેશન માટે અંતિમ મંજૂરી આપી હતી.

ઓસ્ટિને જણાવ્યું હતું કે અલ-સુદાની વર્ષોથી અમેરિકી ગુપ્તચર અધિકારીઓના રડાર પર છે. તેણે આફ્રિકામાં આઇએસઆઇએસની કામગીરી તેમજ અફઘાનિસ્તાનમાં કાર્યરત આઇએસઆઇએસ-કે આતંકવાદી શાખાને ભંડોળ પૂરું પાડવામાં મુખ્ય ભૂમિકા ભજવી હતી. યુએસ ટ્રેઝરી ડિપાર્ટમેન્ટે ગયા વર્ષે આરોપ મૂક્યો હતો કે અલ-સુદાનીએ અન્ય આઇએસ ઓપરેટિવ, અબ્દુલ્લાહ હુસૈન અબાદિગા સાથે નજીકથી કામ કર્યું હતું.