ખેલૈયાઓ લાલઘુમ / બીજા નોરતે પણ યુનાઈટેડ-વેમાં લોકોનો ભયંકર હોબાળો, અતુલ પુરોહિતે મંચ પરથી આપવી પડી ગેરંટી

• યુનાઈટેડ વેના ગરબા મેદાનમાં બીજા દિવસે પણ હોબાળો
• બીજા દિવસે પણ પગમાં કાંકરા વાગતાં ગરબા રમવાનો ઉત્સાહ ઓસરી ગયો  
• અધવચ્ચેથી ગરબા કરવા પડ્યા બંધ, રિફંડના લાગ્યા નારા 

આદ્યશક્તિ મા અંબાના આરાધનાના પર્વ નવરાત્રીની ધૂમધામપૂર્વક ઉજવણી થઈ રહી છે, કોરોનાના બે વર્ષ બાદ આ વખતે કોઈ રોકટોક વગર નવરાત્રીનું આયોજન કરવામાં આવ્યું છે. નવરાત્રી પર્વ નિમિતે ઠેકઠેકાણે ગરબાના આયોજનો કરવામાં આવ્યા છે અને ખેલૈયાઓમાં અનેરો થનગનાટ જોવા મળી રહ્યો છે. તેવામાં વડોદરા શહેરના યુનાઈટેડ વેના ગરબા મેદાનમાં બીજા નોરતે પણ ખેલૈયાઓએ હોબાળો મચાવ્યો હતો. તો કોઈ તોફાની તત્વોએ અતુલ પુરોહિતને પથ્થર માર્યો હતો.

સતત બીજા દિવસે ખેલૈયાઓએ મચાવ્યો હોબાળો
વાત જાણે એવી છે કે, આ વખતે શહેરના અટલાદરના એમ.એમ પટેલ ફાર્મ ખાતે વડોદરાના સૌથી મોટા યુનાઈટેડ વેના ગરબાનું આયોજન કરવામાં આવ્યું છે. ત્યારે નવરાત્રીના બીજા દિવસે પણ યુનાઈટેડ વેના ગરબા મેદાનમાં ખેલૈયાઓએ હોબાળો મચાવ્યો હતો. બીજા નોરતે હજારો ખેલૈયાઓને ગરબા ગ્રાઉન્ડ પર પગમાં કાંકરા વાગતાં ગરબા રમવાનો ઉત્સાહ જ ઓસરી ગયો હતો. ગ્રાઉન્ડમાં ઉમંગભેર ગરબા રમવા આવેલા ખેલૈયાઓ ભારે રોષ જોવા મળતા અધવચ્ચેથી ગરબા બંધ કરવા પડ્યા હતા. 

અધવચ્ચેથી ગરબા બંધ કરવાનો આવ્યો વારો
ગ્રાઉન્ડમાં પથ્થર મુદ્દે સતત બીજા દિવસે હોબાળો થતાં ખેલૈયાઓએ રિફંડની બૂમો પાડતા ગરબા અધવચ્ચેથી બંધ કરવાનો વારો આવ્યો હતો. ખેલૈયાઓ સ્ટેજ પાસે એકઠા થઈ ગયા હતા અને હોબાળો મચાવ્યો હતો. જેથી માંજલપુર પીઆઇ સ્ટેજ પર દોડી આવીને ખેલૈયાઓને તેમની રજૂઆત લેખિતમાં આપવા જણાવ્યું હતું.

અતુલ પુરોહિતે કહ્યું- કાલે ગ્રાઉન્ડ સરખું નહીં હોય તો હું જ ગરબા નહીં શરુ કરું
તો બીજી બાજુ ગાયક અતુલ પુરોહિતે પોતે સ્ટેજ પર દોડી આવ્યા હતા. તેમણે જણાવ્યું હતું કે, 'પહેલીવાર એવું થયું કે મારા છોકરાએ મને પથ્થર માર્યો અને એ પથ્થર મારા માથામાં વાગ્યો. હું તમને નિરાશ નહીં કરું, કાલે ગ્રાઉન્ડ સરખું નહીં હોય તો હું જ ગરબા નહીં શરૂ કરું.' તો આયોજકોએ જેમને પણ રિફંડ જોઇતું હોય તે આવતી કાલે આવીને લઈ જઈ શકે છે તેવું જણાવ્યું હતું. 

 

પહેલા દિવસે પથ્થર-પથ્થરના કર્યા હતા સૂત્રોચ્ચાર
આપને જણાવી દઈએ કે, પ્રથમ નોરતે પણ વડોદરાના યુનાઈટેડ વેના ગરબા મેદાનમાં ખેલૈયાઓ લાલઘુમ થઈ ગયા હતા. ગરબા મેદાન પર પગમાં પથ્થર વાગતા ખેલૈયાઓ સરખી રીતે ગરબાનો આનંદ માણી શક્યા નહોતા. મોંઘા ભાવના પાસ લીધા બાદ ગરબા સ્થળે સુવિધા ન મળતા ખેલૈયાઓએ હોબાળો મચાવ્યો હતો. ગરબાના મેદાનમાં ખેલૈયાઓએ પથ્થર-પથ્થરના સૂત્રોચ્ચાર કર્યા હતા. જેનો વીડિયો હાલ સોશિયલ મીડિયામાં વાયરલ થયો હતો.