- અમેરિકાના અગ્રણી હિંદુ સંગઠન પર નવો કેસ
- ભારતીય કામદારોને ઓછા પગારમાં મંદિરોમાં કામે રાખ્યાં
- માનવ તસ્કરી અને વેતન કાયદાના ઉલ્લંઘનનો આરોપ
અમેરિકાના ન્યૂ જર્સીના રોબિન્સવિલેમાં આવેલ સ્વામિનારાયણ મંદિરની સામે મજૂરોએ જિલ્લા કોર્ટમાં એક નવો કેસ દાખલ કરીને મોટો આરોપ લગાવ્યો છે. ડિસ્ટ્રીક્ટ કોર્ટમાં મજૂરોએ દાખલ કરેલા કેસમાં એવો આરોપ છે કે સંસ્થાએ ભારતના કામદારોને લલચાવ્યા હતા અને સેંકડો કામદારોને દેશભરમાં તેમના મંદિરોમાં ઓછા વેતન પર કામ કરવાની ફરજ પાડી હતી.
બોચાસણ નિવાસી BAPS ની સામે કેસ દાખલ કરાયો
આ વર્ષે મે મહિનામાં ભારતીય કામદારોના એક જૂથે બોચાસણ નિવાસી અક્ષર પુરુષોત્તમ સ્વામિનારાયણ સંસ્થા સામે માનવ તસ્કરી અને વેતન કાયદાના ઉલ્લંઘનનો આરોપ લગાવીને યુએસ ડિસ્ટ્રિક્ટ કોર્ટમાં કેસ દાખલ કર્યો હતો. તેમાં કહેવામાં આવ્યું છે કે તેમને અટકાવવામાં આવ્યા હતા અને ન્યૂ જર્સીમાં વિશાળ સ્વામિનારાયણ મંદિર બનાવવા માટે લગભગ એક ડોલરના વેતન પર કામ કરવાની ફરજ પાડવામાં આવી હતી.
મંદિરોમાં મજૂરોને ઓછા પગારે કામ પર રાખ્યા હોવાનો આરોપ
ન્યૂયોર્ક ટાઇમ્સ અખબારે બુધવારે અહેવાલ આપ્યો હતો કે ગયા મહિને ન્યૂ જર્સીની ફેડરલ કોર્ટમાં દાખલ કરવામાં આવેલા દાવામાં સુધારો કરવામાં આવ્યો હતો. તેમાં BAPS પર આરોપ છે કે તેઓ "ભારતના કામદારોને એટલાન્ટા, શિકાગો, હ્યુસ્ટન અને લોસ એન્જલસ અને ન્યૂ જર્સીના રોબિન્સવિલેના મંદિરોમાં દર મહિને માત્ર 450 ડોલરના વેતન પર કામ કરવાની લાલચ આપે છે." સમાચારમાં કહેવામાં આવ્યું છે કે, "સુધારેલી સુનાવણીએ દેશભરમાં મંદિરોના સમાવેશના આરોપોને વધુ વિસ્તૃત કર્યા હતા જેમાં કેટલાક અન્ય લોકોએ કહ્યું હતું કે તેમને પણ કામ પર મોકલવામાં આવ્યા હતા." દાવોમાં આરોપ મૂકવામાં આવ્યો છે કે સેંકડો કામદારોનું કદાચ શોષણ કરવામાં આવ્યું હતું.
ન્યૂયોર્ક ટાઇમ્સે મે મહિનામાં અહેવાલ આપ્યો હતો
ન્યૂયોર્ક ટાઇમ્સે મે મહિનામાં અહેવાલ આપ્યો હતો કે, આ ફરિયાદમાં છ લોકોના નામ છે જેઓ ધાર્મિક વિઝા 'આર-1 વિઝા' પર 2018ની શરૂઆતથી અમેરિકા લાવવામાં આવેલા લગભગ 200 ભારતીય નાગરિકોમાં સામેલ હતા. તેમાં કહેવામાં આવ્યું છે કે "આ લોકોને ઘણીવાર ન્યૂ જર્સી મંદિર નિર્માણ સ્થળ પર જોખમી પરિસ્થિતિમાં ઘણા કલાકો સુધી કામ કરવા માટે રાખવામાં આવ્યાં હતા.
11 મે 2021 ના દિવસે FBIએ બાપ્સમાંથી 200 કામદારોને છોડાવ્યા હતા
ઇન્ડિયા સિવિલ વોચ ઇન્ટરનેશનલ (આઇસીડબલ્યુઆઇ) સંગઠને મે મહિનામાં જણાવ્યું હતું કે 11 મેની વહેલી સવારે એફબીઆઈની આગેવાની હેઠળના દરોડામાં ન્યૂ જર્સીના રોબિન્સવિલેમાં સ્વામિનારાયણ મંદિર સંકુલમાંથી લગભગ 200 કામદારો, જેમાં મોટા ભાગના દલિતો, બહુજનો અને આદિવાસીઓ હતા, તેમને બહાર કાઢવામાં આવ્યા હતા. આને અમેરિકાનું સૌથી મોટું હિન્દુ મંદિર માનવામાં આવે છે. અહેવાલમાં કહેવામાં આવ્યું છે કે, સુધારેલી ફરિયાદમાં બીએપીએસના અધિકારીઓ પર "દેશના શ્રમ કાયદાઓનું ઉલ્લંઘન અને છેતરપિંડી અને ભ્રષ્ટ સંગઠન પ્રતિબંધ કાયદાનું ઉલ્લંઘન" કરવાનો આરોપ મૂકવામાં આવ્યો હતો.
