ઉત્તર પ્રદેશમાં વિધાનસભા ચૂંટણી પહેલા પ્રધાનમંત્રી મોદીની મેગારેલીને લઈને આયોજન કરવામાં આવ્યું છે.
2022 ચૂંટણીને લઈને ભાજપ હવે આક્રમક મૂડમાં
ડિસેમ્બર મહિનામાં પીએમ મોદીના તાબડતોબ પ્રવાસ
આગામી સમયમાં મેગા રેલીની તૈયારીઓ શરૂ
યુપીનો શંખનાદ ફૂંકશે પીએમ મોદી
ઉત્તર પ્રદેશમાં આગામી વર્ષે વિધાનસભા ચૂંટણી થવાની છે ત્યારે પ્રધાનમંત્રી મોદી નવેમ્બર મહિનાથી જ વારંવાર રાજ્યની મુલાકાતે છે. એવામાં જાન્યુઆરીમાં એક મેગા રેલીનાં માધ્યમથી ચૂંટણીનું રણશિંગુ ફૂંકવાની તૈયારીઓ શરૂ કરી દેવામાં આવી છે. ઉત્તર પ્રદેશના સ્થાનિક મીડિયા અહેવાલ દ્વારા સૂત્રોની મળતી માહિતી અનુસાર પ્રધાનમંત્રી નરેન્દ્ર મોદી જાન્યુઆરી મહિનામાં લખનૌમાં એક મેગા રેલીને સંબોધન કરી શકે છે. ભારતીય જનતા પાર્ટીના કાર્યકરોએ કાર્યક્રમ માટે તૈયારીઓ શરૂ કરી દીધી છે અને થોડા દિવસ બાદ તેની સત્તાવાર જાહેરાત પણ કરવામાં આવી શકે છે.
10 લાખ લોકોને ભેગા કરવાની તૈયારી
જાણકારી અનુસાર ભારતીય જનતા પાર્ટી દ્વારા આ મેગા રેલીને ઐતિહાસિક બનાવવાની તૈયારી કરવામાં આવી રહી છે, પ્લાન છે કે આ રેલીમાં 10 લાખ લોકોને ભેગા કરવામાં આવે. 9થી 11 જાન્યુઆરીની વચ્ચે રેલીનું આયોજન થઈ શકે છે.
યુપીમાં વિકાસની 'ગંગા'
PM મોદી ઉત્તરપ્રદેશને ફરી એક મોટી ભેટ આપી રહ્યા છે. ઉત્તર પ્રદેશમાં પ્રધાનમંત્રી મોદી આજે ગંગા એક્સપ્રેસ વેનું ભૂમિપૂજન કરશે. 594 કિલોમીટર લાંબો આ એક્સપ્રેસ વે બની રહ્યો છે. ત્રણ વર્ષના સમયગાળામાં આ એક્સપ્રેસ વે પૂર્ણ કરવામાં આવશે. 36,230 કરોડના ખર્ચે આ એક્સપ્રેસ વે તૈયાર કરવામાં આવશે. પ્રાઇવેટ પબ્લિક પાર્ટનરશીપથી આ એક્સપ્રેસ વે બનાવવામાં આવશે. એક્સપ્રેસ વેની સાથે ઔદ્યોગિક કોરિડોર પણ બનાવવામાં આવશે. આ કોરિડોરથી આર્થિક અને સામાજીક વિકાસ પણ થશે. આ ઉપરાંત એક્સપ્રેસ વે પર સેના માટે 3.5 કિમીની હવાઇ પટ્ટી પણ બનાવવામાં આવશે.