અનોખુ અભિયાન / બનાસકાંઠાના પશુપાલકોના નવા અભિયાનથી જિલ્લામાં બનશે જંગલ, કામગીરીને કરશો સલામ

• બનાસકાંઠાને હરિયાળું બનાવવા પ્રયત્ન
• બનાસડેરી અને વનવિભાગનું નવુ અભિયાન 
• ગોબરમાંથી 25 લાખ સીડબોલ બનાવ્યા

કપાતા જંગલોને અટકાવવા અને વધુ વૃક્ષો વાવી પ્રકૃતિનું જતન કરવું આજના સમયમાં મહત્વનું બની ગયું છે. ત્યારે બનાસડેરીએ બનાસકાંઠા તળોવો ઊંડા કરવાની કામગીરીની સાથે-સાથે હવે વધુ વૃક્ષો ઉગાડી ફરી વેરાન જગ્યાએને જંગલો બનાવવાની મુહિમ હાથ ધરી છે. જેમાં 25 લાખ જેટલા સીડબોલ ગીરીમાળાઓમાં ફેંકવાનું અભિયાન શરૂ કર્યુ છે.

જંગલ આસપાસ સીડબોલ મૂકવાની કામગીરી શરૂ 
એક તરફ પ્રકૃતિના નિકંદન કરનારા બેઠા છે. તો બીજી તરફ પ્રકૃતિનું જતન કરનારા પણ સમાજમાં હયાત છે. બનાસડેરી તેમજ વનવિભાગે બનાસકાંઠાને હરિયાળું બનાવવા માટે એક નવા અભિયાનની શરૂઆત કરી છે. જેમાં અરવલ્લીની ગિરિમાળાઓને લીલીછમ બનાવવા માટે 25 લાખ સીડબોલ બનાવાયા છે. આ સીડબોલ એટલે કે, ગાયના ગોબરમાંથી બોલ બનાલી તેની અંદર વિવિધ વનસ્પતિ અને ઔષધીઓના બીજ મુકવામાં આવે છે.

ઊંચા પહાડો પર ડ્રોનથી સીડબોલ ફેંકાશે 
ગાયના ગોબરમાંથી સીડબોલ બનાવવાનું કારણ એ છે કે, જ્યાં પણ આ સીડબોલ ફેંકવામાં આવે છે. ત્યાં ચોમાસામાં વરસાદ થતાં ગોબરના બોલ ઓગળી ગયા બાદ બીજ ઊગી નિકળશે. સાથે જ તે બીજને કુદરતી ખાતર પણ મળી રહેશે. જેને પગલે બીજનો વિકાસ પણ થઈ શકશે. બનાસડેરી અને પશુપાલકોએ વનવિભાગ સાથે મળીને અંબાજીની ગબ્બર સહિતની અરવલ્લીની ગિરિમાળાઓમાં આ સીડબોલ નાખવાના અભિયાનના શ્રી ગણેશ પણ કરી દીધા છે. એટલું જ નહીં જે પહાડો ઊંચા છે. જ્યાં કોઈ પહોંચી નથી શક્યું. ત્યાં ડ્રોનની મદદથી સીડબોલ નાખવાની કામગીરી હાથ ધરાઈ છે.

પ્રકૃતિના જતન માટે નવું અભિયાન 
બનાસડેરી અને પશુપાલકો દ્વારા શરૂ કરવામાં આવેલું આ અભિયાનના સ્થાનિકો મુક્ત મને વખાણ કરી રહ્યા છે. આવું જ અભિયાન દરેક જિલ્લામાં શરૂ કરવા સામાજિક સંસ્થાઓ, આગેવાનો આગળ આવે તે સમયની માંગ છે. જેથી ગુજરાતમાં વૃક્ષોનું પ્રમાણ વધે અને દુષ્કાળ જેવી પરિસ્થિતિનો સામનો ન કરવો પડે. બનાસકાંઠાને હરિયાળુ બનાવવા બનાસડેરી અને પશુપાલકોએ ચિતરેલો આ નવો ચીલો અન્ય શહેરના લોકો માટે અનુકરણીય છે.