જે લોકોએ હાઈવેના કોન્ટ્રાક્ટરો પાસેથી કટકી કરી છે તેમની હવે ખેર નથી. કેન્દ્ર સરકાર હવે આ કટકીબાજો પર કાર્યવાહી કરવાના મૂડમાં છે. આ મામલે રોડ અને પરિવહન મંત્રી નીતિન ગડકરીએ પોતે પગલા લીધા છે. કેન્દ્રીય મંત્રી નીતિન ગડકરીએ તપાસ એજન્સીઓને પત્ર લખ્યો છે.
રોડ નિર્માણમાં કટકીને લઈને ફરિયાદ
કોન્ટ્રાક્ટોરોએ ગડકરીને કરી હતી ફરિયાદ
નીતિન ગડકરીએ માગ્યા હતા ઓડિયો-વીડિયો
નીતિન ગડકરીએ CBI અને ED ને પત્ર લખ્યો છે અને તપાસ કરવા કહ્યું છે. કેન્દ્રીય મંત્રીએ ઓડિયો અને વીડિયોનું રેકોર્ડિંગ CBI અને EDને મોકલી આપ્યું છે. કહેવામાં આવી રહ્યું છે કે આ એવા સાંસદો અને ધારાસભ્યોનો ઓડિયો-વીડિયો છે જેમણે હાઈવેના કોન્ટ્રાક્ટરો પાસેથી કટકીની માગણી કરી છે. આ ઓડિયો-વીડિયો છૂપી રીતે બનાવવામાં આવ્યા છે.
નીતિન ગડકરી આ મામલે બોલ્યાં હતાં કે, લગભગ 4 મહિના પહેલાં કોન્ટ્રાક્ટરો મારી પાસે કટકી કરવામાં આવતી હોવાની ફરિયાદ લઈને આવ્યા હતા. ત્યારે મેં તેમને કહ્યું હતું કે તમે આવા કટકીબાજોના ઓડિયો-વીડિયો બનાવી લો. ત્યાર બાદ હવે આ બધા ઓડિયો-વીડિયો CBI અને EDને મોકલી આપ્યા છે. રોડ નિર્માણના કાર્યમાં કોઈ ભ્રષ્ટાચાર નહીં ચાલે.
આપને જણાવી દઈએ કે કેન્દ્રીય મંત્રીએ તપાસ એન્જિસીઓને એક પત્રમાં રોડ નિર્માણમાં સાંસદો અને ધારાસભ્યો કોન્ટ્રાક્ટર પાસેથી કટકી માગે છે અને પ્રોજેક્ટ અટકાવી દેવાની ધમકી આપવામાં આવે છે તેવી ફરિયાદ કરવામાં આવી હતી.
જણાવાય રહ્યું છે કે લાંચ માંગવાની સૌથી વધુ ફરિયાદો મહારાષ્ટ્ર સાથે જોડાયેલ છે. રોડ કોન્ટ્રાક્ટરોએ કેન્દ્રીય મંત્રીને આ પહેલા પોતાની ફરિયાદમાં કહ્યું હતું કે સ્થાનિક ધારાસભ્યો અને સાંસદો લાંચ માટે તેમને ધમકાવે છે અને પ્રોજેક્ટ રોકવાની ધમકી પણ આપે છે. જો કે હવે આ સમગ્ર મામલે CBI અને EDને ઓડિયો-વીડિયો સોંપાયા બાદ એવી આશંકા સેવાઈ રહી છે કે આ કટકીકાંડમાં ઘણા મોટા નેતાઓના નામ ખુલી શકે છે.