મહામારી / અમેરિકા જવા માગતા લોકો માટે બાયડનનો રાહતભર્યો નિર્ણય, પરંતુ ભારતીયોને પડશે આ મુશ્કેલી

• અમેરિકા જવા માંગતા લોકો માટે સારા સમાચાર 
• નવેમ્બરથી અમેરિકાનો પ્રવાસ કરી શકાશે
• જોકે વેક્સિનના બધા ડોઝ લીધા હશે તેમને જ મંજૂરી

અમેરિકાએ આંતરરાષ્ટ્રીય યાત્રા માટે નવી પ્રણાલીની જાહેરાત કરી દીધી છે. નવી આંતરરાષ્ટ્રીય યાત્રા પ્રણાલી હેઠળ બાયડન સરકારે ભારત, ચીન અને બ્રાઝીલ સહિત 30 દેશોના નાગરિકોને તેમને દેશ આવવાની મંજૂરી આપી દીધી છે. 

વેક્સિનના બધા ડોઝ લેનાર લોકો જ આવી શકશે અમેરિકા
જોકે બાયડન સરકારે એક શરત પણ મૂકી છે. જે લોકોએ વેક્સિનના બધા ડોઝ લીધો હશે ફક્ત તેમને જ અમેરિકા આવવાની મંજૂરી મળશે. 

વ્હાઈટ હાઈસના અધિકારીઓએ જણાવ્યું કે ભારત જેવા દેશોમા સંપૂર્ણ વેક્સિનેશન કરાવનાર લોકો તેમના વેક્સિન પ્રમાણપત્રની સાથે અમેરિકાની યાત્રા કરી શકે છે. તેમણે પ્રવાસ પહેલા વેક્સિન પ્રમાણપત્ર રજૂ કરવું પડશે.

અમેરિકાએ નવેમ્બરથી ભારત સહિત 30 દેશો માટે તેના દ્વાર ખોલી નાખ્યાં છે. પરંતુ ભારતીયો માટે અમેરિકા જવું મુશ્કેલીભર્યું બની શકે છે. કારણ કે ભારતમાં લોકોએ જે વેક્સિન લીધી છે તે જો અધિકૃત નહીં થાય તો ભારતીયોને પ્રવેશ મળશે નહીં. 

કઈ વેક્સિન માન્ય હશે
યાત્રા પહેલા વિદેશી નાગરિકોએ વેક્સિન પ્રમાણપત્ર રજૂ કરવું પડશે, પ્રમાણપત્ર રજૂ કરનારે અમેરિકામાં પહોંચ્યા પછી ક્વોરન્ટાઈન થવાની જરુર નહીં પડે. વ્હાઈટ હાઉસે કહ્યું કે કઈ વેક્સિન માન્ય રખાશે તેનો અંતિમ નિર્ણય યુએસ સેન્ટર ફોર ડિસિઝ એન્ડ પ્રીવેન્શન પર નિર્ભર છે.